Қазақстан Президенті 2026 жылғы 11 маусымда Салық кодексіне өзгерістер енгізу туралы заңға қол қойды. Құжат 2026 жылғы 1 шілдеден бастап күшіне енеді және онда құқықтық терминдерді нақтылау мен мемлекеттік басқару жүйесіндегі өзгерістерге байланысты бірқатар түзету қарастырылған.

Жаңа заңға сәйкес, Салық кодексіндегі нормалар бірқатар заңнамалық өзгерістермен сәйкестендірілді.

Салық кодексінде қандай өзгерістер болады?

• бір палаталы Парламент – Құрылтайдың жұмыс істеуіне, сондай-ақ Қазақстан Халық Кеңесінің құрылуына байланысты өзгерістер енгізіледі;
• кодекс мәтініндегі «шетелдік» термині «шетел азаматы» деген нақтылаумен ауыстырылады;
• ұлттық валютаның атауы барлық баптарда бірыңғай «теңге» нұсқасында жазылады;
• құқықтық терминологияны жетілдіруге бағытталған редакциялық түзетулер енгізіледі. Атап айтқанда, 23-баптың 3-тармағындағы «заңнамалық актілер» деген сөздер «заңдар» сөзімен ауыстырылады;
• референдумға қатысты тұжырымдар нақтыланып, «республикалық референдум» орнына «жалпыхалықтық референдум» атауы қолданылады;
• аумақтардың атауын көрсету тәртібі өзгереді. Енді олар «астана, облыс, республикалық маңызы бар қала» ретімен жазылады.

Конституциялық сотқа жүгіну арзандай ма?

Заңдағы маңызды жаңалықтардың бірі – Конституциялық сотқа жүгінген кезде төленетін мемлекеттік баждың алынып тасталуы. Бұл өзгеріс «Қазақстан Республикасының Конституциялық соты туралы» заңның 40-бабына енгізілген түзетулерге байланысты жүзеге асырылып отыр.

Осылайша, азаматтар мен ұйымдар Конституциялық сотқа жүгінген кезде бұрын көзделген мемлекеттік бажды төлемейді.

Бұл не үшін маңызды?

Қабылданған түзетулердің басым бөлігі техникалық және редакциялық сипатқа ие. Дегенмен олар заңнаманы біріздендіруге, құқықтық терминдерді нақтылауға және азаматтардың Конституциялық сотқа жүгіну мүмкіндігін жеңілдетуге бағытталған.

Заң 2026 жылғы 1 шілдеден бастап қолданысқа енгізіледі.