Электрлі G7 кроссоверіне тапсырыс көбейді

Компания жаңа электрлі кроссовері G7-ге алдын ала тапсырыс қабылдауды бастады. Қазіргі кезде тек бір комплектация қолжетімді, оның бағасы 235 800 юаньды (16.5 млн теңгеден асады) құрайды. Алайда, тапсырыс бергендер саны өте көп. Қытайдағы баспасөздің хабарлауынша, жаңа кроссовер медиатехнология мен автономды жүргізу саласындағы бірқатар технологиялық мүмкіндіктері арқасында сұранысқа ие болды.

G7 кроссоверінің өлшемдері 4892×1925×1655 мм, ал дөңгелек базасы 2890 мм болады. Автокөлікте 20 дюймдық дөңгелектері бар, ал қуаттылығы 296 ат күшіне тең жалғыз қозғалтқышымен жабдықталған. Екі түрлі аккумуляторының сыйымдылығы 68.5 және 80.8 кВт·сағ, ал жүріс қоры 577-702 км-ге дейін жетеді, бұл батареяның көлеміне және дөңгелек өлшеміне байланысты.

Жаңа кроссовер минималистік стильде жасалған. Салонда физикалық батырмалар мен аспаптар панелі жоқ. Оның орнына Huawei әзірлеген 87 дюймдік проекциялық дисплей қолданылған. Бұл дисплей навигатор нұсқауларын жолға түсіріп, көліктің басты технологиялық артықшылықтарының бірі болып табылады.

Сыртқы және ішкі ақпаратты Turing AI чипі өңдейді, оның есептеу қуаты 2200 TOPS. G7-ге орнатылған бұл чип Nvidia көрсеткішінен жоғары болып табылады. Автокөлік 3-деңгейлі автономды жүргізуші көмекшілерін қамтиды.

Келер кезеңде Xpeng G7-нің бағасы 200 мың юаньға (шамамен 14 млн теңге) дейін төмендеуі мүмкін. Жергілікті баспасөз компанияның алдымен ең қымбат нұсқасын ұсынып, кейін арзан әрі қарапайым нұсқасын шығаруы мүмкін екенін хабарлады.