Қытай Volkswagen зауыттарын сатып алуға мүдделі

Қытайдың ірі автоконцерндері Volkswagen компаниясының жұмысын мұқият бақылап, жабылатын зауыттарға қызығушылық танытуда. Reuters-тің хабарлауынша, кем дегенде бір зауытты сатып алу бойынша алдын ала келіссөздер басталған. Volkswagen компаниясы операциялық шығындарды азайту мақсатында былтыр кәсіподақтармен Германиядағы кейбір зауыттың жұмысын тоқтату туралы келіссөздер жүргізген.

Соңғы мәліметтер бойынша, компания бірнеше мың қызметкерді қысқартып, бірнеше конвейерді тоқтатуға келісім жасасты. VW босатын зауыттарға Қытайдағы инвесторлар назар аударуда. Олар Еуропадағы ықпалын арттыра отырып, электрокар жеткізудегі қосымша салықты айналып өтуді жоспарлауда.

Германия мен Қытай арасындағы күрделі қарым-қатынасқа байланысты бұл инвестицияның саяси салдары болуы мүмкін. Volkswagen бірнеше жыл бойы Германияның өнеркәсіптік қуатының символы болып табылады, сондықтан осындай қадам неміс билігіне қиыншылық туғызуы ықтимал.

Келіссөздер мен болжамдар

Келіссөздердің бірі Оснабрюктегі зауытқа қатысты. VW жоспарына сәйкес, аталған зауыт 2027 жылы жабылады. Қытай инвесторлары Дрездендегі кәсіпорынға да қызығушылық танытуда — бұл жерде қазіргі кезде ID.3 моделінің өндірісі жүріп жатыр, алайда биыл конвейердің тоқтатылатыны хабарланған.

Кейбір расталмаған деректерге сәйкес, мәміле жасасуға BYD мен Chery компаниялары қызығуда. Германияда ақпанда өтетін сайлаудан кейін жағдайдың анықталуы мүмкін.

Volkswagen-нің ресми жауабы

Volkswagen зауыт сату туралы жоспармен жұмыс істеп жатқандарын теріске шығарды. Концерннің қаржылық коммуникациялар директоры Кристофер Хаусс "РИА Новости" басылымына берген сұхбатында мұның бәрі шындыққа жанаспайтындығын айтты.

Алайда, концерн басшылығы жабылудың алдында тұрған зауыттардың кем дегенде біреуін сақтап қалу үшін басқа компаниялармен бірлесіп жұмыс істей алады. Кәсіподақ өкілдерінің сөздерінше, Volkswagen бренді сақталған жағдайда, ұжым Қытай өндірушілерімен тығыз ынтымақтастыққа дайын.