Ауыл шаруашылығына зиянды өтеуге өтінімдер мерзімі ұзартылды

Қазақстанның Ауыл шаруашылығы министрлігі табиғи сипаттағы төтенше жағдайлар нәтижесінде физикалық және заңды тұлғаларға келтірілген зияндарды өтеу ережелеріне өзгерістер енгізуді жоспарлап отыр. 2024 жылы бүлінген ауыл шаруашылығы дақылдарының тұқымдары мен инкубациялық жұмыртқасын жоғалтуына өтінім қабылдау мерзімін 1 желтоқсанға дейін ұзарту көзделуде - деп хабарлайды eldala.kz тілшісі.

Зиянды өтеу үшін қажетті құжаттар

Зиянды өтеу өтініміне тұқымдардың сорттық және себу сапаларын растайтын құжаттардың көшірмелері қоса берілуі қажет. Комиссия мүшелері өтінімдерді қарау барысында тұқымдар есебінің журналы мен бақылау журналының деректерін қосымша зерттейді, ал тексеру нәтижелері бойынша акт дайындалады.

Зиян мөлшерін есептеу

Зиян комиссия тарапынан ауыл шаруашылығы дақылдарын өсіру үшін гектарға жұмсалған шығындар негізінде, ауыл шаруашылығы дақылдарын өсіру технологиялық картасына сәйкес және нарықтық бағасына сәйкес анықталады.

• Егер ауыл шаруашылығы өндірушісі субсидия алушы болса, онда зиян мөлшері субсидиялар сомасын есепке ала отырып анықталады.
• Технологиялық карта комиссия тарапынан ашық және жабық топырақта ауыл шаруашылығы дақылдарын өсіру үшін арнайы дайындалады.

Зиянды есептеу формуласы

Бүлінген ауыл шаруашылығы дақылдарының тұқымдары үшін зиян мөлшері өсімдік шаруашылығы комиссиясы тарапынан мына формула бойынша анықталады:

С = К*Н – S, мұнда: С – зиян мөлшері (тенге); К – бүлінген тұқымдардың саны (тонна); Н – ауыл шаруашылығы дақылдарының нарықтық бағасы (тенге/тонна); S – субсидиялар сомасы (тенге).