КТЖ: маусым айында астық тиеуді көбейту қажет

Ұлттық компания «КТЖ» жүк жөнелтушілерге мамыр және маусымда астық тиеуді арттыруды ұсынды. Жоспарланған көлемдерді жедел шығару, элеваторларды босату және 2025 жылғы егін жинау науқаны үшін қажетті шараларды жүргізу мақсатында жүзеге асыру керек - деп хабарлайды eldala.kz тілшісі.

КТЖ-ның мәліметі бойынша, 2025 жылдың қаңтар-мамыр айларында теміржолмен астық тасымалдау өткен жылдың осы кезеңімен салыстырғанда 54%-ға артып, 4,7 миллион тоннаны құраған. Оның 3,7 миллион тоннасы экспортқа жіберілген, бұл көрсеткіштің өсуі 60%-ға жеткен.

Экспорттың өсуі

Орталық Азия елдеріне жеткізілген астық көлемінің көбеюі байқалады:

• Өзбекстанға экпорт 18%-ға артты;
• Тәжікстанға 45%-ға жетті;
• Түрікменстанға екі есе артты;
• Қырғызстанға төрт есе өсті.

Балтық мемлекеттеріне экспорт 8 есе, Каспий порттары арқылы Иранға — 10 есе артқан.

2024-2025 жылдардағы қорытындылар

Маркетингтік жыл қорытындысы (2024 жылдың қыркүйесінен 2025 жылдың сәуіріне дейін) бойынша, КТЖ желісі бойынша астық тасымалдау көлемі 9,8 миллион тоннаны құрады, бұл өткен жылмен салыстырғанда 52%-ға артты. Экспорт 58%-ға артып, 7,7 миллион тоннаны құрады.

Орталық Азия елдеріне арналған жеткізілімдер 35%-ға, яғни 4 миллион тоннаға жетті. Иранға экспорт 16 есе, Ауғанстанға 34%, Қара теңіз порттарына 28%, Балтық мемлекеттеріне 4 есе артты.

Дәнді дақылдар одағының болжамы бойынша, биылғы маусымда бидай мен ұн экспортының көлемі 11,1 миллион тоннаға дейін жетуі мүмкін, ал 2024/25 ж. өнім жинау маусымының соңында бидайдың өтпелі қорлары 2,2-2,5 миллион тонна болмақ.