Түркістан облысында сарымсақты терең өңдеу мүмкіндігі талқыланды

Ванлин Групп компаниясының өкілдері және Түркістан облысының әкімі Нуралхан Кушеров бастаған қазақстандық делегация Қытайда кездесіп, Түркістан облысында сарымсақтың терең өңдеу мүмкіндігін талқылады - деп хабарлайды eldala.kz тілшісі.

Келіссөздер барысында сарымсақты өсіру және өңдеу бойынша бірлескен жобаларды іске асыру туралы айтылды. Халықаралық компания өз тәжірибесімен бөлісіп, Түркістан облысының агроклиматтық жағдайларын жоғары бағалады. Тараптар инвестициялар, заманауи өңдеу зауыттарының құрылысы және экспорттық логистиканы дамыту мәселелерін талқылады.

«Кездесудің нәтижесінде тараптар Түркістан облысында агроиндустриалдық кластер құру, сарымсақ өсіру көлемін арттыру, фермерлермен ұзақ мерзімді келісімшарттар жасау және дайын өнімді шетелге экспорттау бойынша бірлескен жұмыс жүргізуге келісті», - деп атап өтті әкімдікте.

Делегация сапары барысында өңдеу цехтарымен және компанияның логистикалық инфрақұрылымымен танысып, сарымсақтың терең өңделуі мен экспортын жүзеге асыратын өндірістік алаңдарда болды. Сондай-ақ, сапар қатысушылары әлемдік сарымсақ бағасын реттеу орталығының жұмысы туралы ақпарат алды.

Wanglin Group компаниясы сарымсақты өңдеу, мұздату, кептіру, сақтау және әлемдік нарыққа жеткізу бойынша 20 жылдан астам тәжірибеге ие. Жалпы егістік көлемі 500 мың гектарды құрайды, жыл сайынғы өнім көлемі - 8 миллион тонна. Экспорт көлемі - 4 миллиард доллар. Сақтау қоймаларының сыйымдылығы - 4,8 миллион тонна. Сарымсақтан дәрі-дәрмектер мен витаминдердің кең ауқымы дайындалады.

«Бүгінгі келіссөздер Түркістан облысы үшін маңызды кезең. Біз ауыл шаруашылығын дамытудың жаңа кезеңіне кірісеміз… Фермерлеріміз экологиялық таза өнімдер өсіруде тәжірибелі. Енді халықаралық нарықтарға шығу үшін оларға жаңа технологиялар мен инвестициялар қажет. Бұл жұмыс орындарын құруға, ауылдағы табыстарды арттыруға және экспорт көлемін ұлғайтуға көмектеседі. Біз бұл мақсатқа барлық күш-жігерімізді жұмсайтын боламыз», - деп атап өтті Нуралхан Кушеров.