Қазақстанда пойыздарда ғаламтор қолжетімділігі: жаңа мүмкіндіктер ашылуда

Қазақстанда жолаушыларға ғаламтор қолжетімділігін ұсынған алғашқы пилоттық жоба аясында №3/4 «Астана-Алматы» пойызы елордадан жолға шықты. Аталған бағыттағы сапар 17 сағатқа созылатын болады. Алғашқы сапарда 500 жолаушы ғаламторға қосылу мүмкіндігін пайдаланған.

Жолаушылар жаңа қызмет түрі арқылы WhatsApp-та бейнеқоңырау шалып, YouTube-тан бейнероликтер көріп, танымал ғаламтор-сервистерді қолданды. Алайда, торренттер мен ағынды жүктеу сайттарына кіруге шектеу қойылғанын ескерген жөн.

Заманауи технологиялар

Пойыздағы ғаламтор заманауи спутниктік технологиялар арқылы іске қосылған. Локомотивке орнатылған спутниктік құрылғы бір пойыз құрамында тұрақты және жоғары жылдамдықты ғаламторға қолжетімділікті қамтамасыз етеді.

«Пойыздарда ғаламторды енгізу  жолаушылар тасымалын дамыту жолындағы маңызды қадам. Бұл жоба жолаушыларға байланыста қалып, әрі жұмыс істеп, әрі демалуға мүмкіндік береді», — деді «Жолаушылар тасымалы» АҚ Басқарма төрағасы Әнуар Ахметжанов.

Жобаның жүзеге асырылуы

Жобаны жүзеге асыру Цифрлық даму, инновациялар және аэроғарыш өнеркәсібі министрлігі, Көлік министрлігі, сондай-ақ «Jusan Mobile» телекоммуникациялық компаниясы мен Қазақстандағы Eutelsat-OneWeb ресми дистрибьюторының бірлескен жұмысының нәтижесінде мүмкін болды.

«Пилоттық жобаның іске қосылуы  көлікті цифрландыру бағытындағы маңызды қадам. Бұл жетістік еліміздің цифрлық дамуына жаңа мүмкіндіктер ашып, қазақстандықтардың сапарларын бұрынғыдан да қолайлы етеді», — деп атап өтті, Цифрлық даму, инновациялар және аэроғарыш өнеркәсібі министрі Жаслан Мадиев.

Қосымша қызметтер мен мүмкіндіктер

Жоба аясында билеттерді тексеруге арналған мобильді терминалдар, пойыз басшылары үшін бейнерегистраторлар және бейнебақылау жүйелері орнатылды. Барлық жазбалар автоматты түрде бұлтты деректер қоймасында сақталып, бақылау мен қауіпсіздік деңгейін жоғарылатуға мүмкіндік береді.

Сонымен қатар, ғаламтордың енгізілуі мейрамхана вагонындағы төлем жүйесіне өзгеріс әкелді. Енді жолаушылар тапсырыстарын жол барысында POS-терминалдар арқылы төлей алады.