Қазақстанның Батыс-Шығыс ұлттық гипермагистралінің жаңа мүмкіндіктері

Батыс-Шығыс ұлттық гипермагистралінің құрылысы деректерді беру көлемін айтарлықтай ұлғайтып, Қазақстанды халықаралық интернет-трафик транзитіндегі негізгі қатысушыға айналдырмақ. 6 ақпанда Қазақстан Республикасының ЦДИАӨМ мен «Freedom Telecom Holding Ltd.» компаниясы арасында ынтымақтастық туралы меморандумдарға қол қойылды.

Бұл бастамаларды жүзеге асыру елге Еуропа мен Шығыс Азия арасындағы халықаралық деректер транзиті үшін баламалы маршрут құруға мүмкіндік береді. Сонымен қатар, жоба Қазақстанның цифрлық қызметтер саласындағы бәсекеге қабілеттілігін арттыруға және әлемдік ірі IT-компанияларды тартуға зор ықпал етеді.

Жобаның ерекшеліктері

Гипермагистралдің құрылысы деректерді беру кідірістерін азайтуға, қосылу жылдамдығын арттыруға және трафикті өткізуге арналған баламалы маршрут қалыптастыруға бағытталған. Жоба 2026 жылы аяқталады.

Негізгі бағыттар

• Бұлтты технологиялар
• Қаржылық операциялар
• Жасанды интеллект
• Киберқауіпсіздік

Гипермагистраль құрылысы ірі IT-компанияларды, телекоммуникациялық корпорацияларды және деректерді қауіпсіз тасымалдауға мүдделі қаржы институттарын тартуға ықпал етеді.

Деректерді өңдеу орталықтары

Қазақстанның цифрлық инфрақұрылымын дамытудың маңызды бөлігінің бірі - заманауи деректерді өңдеу орталықтарын (ДӨО) салу. Бұл орталықтар контентті жинақтап, трафиктің тұрақты байланысын қамтамасыз етеді.

Tier-III халықаралық стандартына сәйкес салынатындықтан, деректерді өңдеу орталықтары жоғары сенімділік пен қауіпсіздік деңгейін қамтамасыз етеді.

«Батыс-Шығыс ұлттық гипермагистралін салу» және «Tier-III деңгейінен төмен емес ДӨО құру» жобалары Қазақстанның цифрлық дамуындағы стратегиялық маңызды қадам болып табылады.

Меморандумға қол қою еліміздің халықаралық трафик транзитіндегі үлесін арттыруға және сенімді деректерді сақтау инфрақұрылымын қалыптастыруға мүмкіндік береді.

Жобаларды жеке инвестициялар есебінен қаржыландыру жоспарланған.