GAC брендінің жаңа модельдері Қазақстанда пайда болды

Жақында GAC бренді Қазақстан нарығына M8 минивэнін, ірі GS8 және шағын GS3 кроссоверлерін ұсынған еді. Енді модельдер қатарына екі жаңа көлік қосылды.

GAC GS4 Max

Бренд Қытайда Trumpchi GS4 деп аталатын бірінші буындағы GAC GS4 прототипін алғаш рет 2015 жылы Детройт автосалонында көрсетті. Сериялық нұсқасы сол жылы Шанхайда жарық көрді. Қазақстанға атауында Max тіркемесі бар GS4-тің үшінші буыны келген. Компания оны былтыр наурызда таныстырды.

Автомобильдің ұзындығы — 4685 мм, ені — 1901 мм, биіктігі — 1690 мм, дөңгелек базасы — 2750 мм. Өлшемі жағынан Toyota RAV4-ке жақын.

GS4 Max 170 ат күшіне ие (250 Нм) 1.5 литрлік турбомотормен және қосарлы іліністі 7 сатылы роботпен жабдықталады. Көлік тек алдыңғы жетекті, толық жетекті нұсқасы жоқ.

Машина 16 млн теңге (арнайы ұсыныс пен жеңілдікті есептемегенде) тұратын жалғыз комплектацияда қолжетімді. Жабдықтар тізіміне алдыңғы және бүйірлік қауіпсіздік жастығы, айнала шолу камерасы, бейімді круиз-бақылау, белсенді тежеу, жолақта ұстау жүйесі сияқты көмекші электрониканың кең жинағы кіреді. Кроссоверде климат-бақылау, алдыңғы орындықтарды, алдыңғы әйнек пен айнаны жылытқыш, электр көмегімен реттелетін орындықтар, 7 дюймдік аспаптар панелі, 10.1 дюймдік мультимедиа экраны, кілтсіз ашу жүйесі, сымсыз қуаттағыш және басқа опциялар бар.

GAC Empow

Empow алғаш рет 2020 жылы Гуанчжоу автосалонында EMPOW55 концептісі ретінде жарық көрді. 2021 жылы сериялық өндірісі басталып, бірнеше нұсқасы пайда болды. Мексикада 238 ат күшін беретін гибриді Dodge Attitude-ке айналды.

Қазақстандағы седанның ұзындығы — 4.7 метр, дөңгелек базасы — 2.7 метр және тек 170 ат күшін беретін 1.5 литрлік турбомотормен сатылады. Агрегат 7 сатылы роботпен жұмыс істейді.

Комплектациясы мен бағасы

Модель екі комплектацияда қолжетімді. Базалық GS 13.7 млн теңге тұрады. Ол алдыңғы қауіпсіздік жастығы, артқы парктронигі бар электронды көмекші, қарапайым круиз-бақылау, шина қысымын бақылау жүйесі, кондиционер, кілтсіз ашу жүйесі, 10.25 дюймдік мультимедиа, 7 дюймдік аспаптар панелімен жабдықталады. Рөл мен орындықтар қолмен реттеледі. Салоны матамен қапталған.

Қымбатырақ GL S-Style спорттық бастырық, күштік құрылымның басқаша баптаулары, дыбысы реттелетін газ шығару жүйесі, 18 дюймдік дискілер, люк, бүйірлік эйрбег және қауіпсіздік пердесі, алдыңғы әйнек, айна мен рөл жылытқыш, барлық орындықты жылытқыш, климат-бақылау, электр көмегімен реттелетін алдыңғы орындықтар, 8 динамикті аудиожүйе, сымсыз қуаттағыш, үлкен 10.25 дюймдік аспаптар панелі, бейімді круиз, автоматты тежеу, жолақта ұстау және бақылау сияқты жүргізуші ассистенттерінің заманауи кешенімен ерекшеленеді. Интерьері былғарымен қапталған. Бағасы — 15.4 млн теңге.