Қытай көліктері: Таяу Шығыс пен Африка нарығында қарқынды өсу

Британиялық The Economist мағлұматтарына сәйкес, Қытай автоөндірушілері Таяу Шығыс пен Африкадағы нарық үлесін нөлден 8%-ға, Оңтүстік Америкада 6%-ға, Оңтүстік-Шығыс Азияда 4%-ға дейін көтерген.

Қытай автокөліктері өздерінің тауарларын шетелдік компаниялар филиалдары жоқ мемлекеттерге жібереді. Яғни, Қытайдың заманауи брендтері бұрыннан келе жатқан өзінің бәсекелестерін нарықтан ығыстыруда.

Ішкі дағдарыстың әсері

Қытай автоөндірісіндегі экспансияның артуына ішкі нарықтағы дағдарыс елеулі себеп болды. 2024 жылы Аспан асты елінде 23 миллионға жуық көлік сатылса да, сауда қарқыны төмендеп, автоөнеркәсіп артық өнім мәселесіне тап болды. Нәтижесінде зауыттар тек жартылай қуатпен жұмыс істеп жатыр. Егер барлық күшін жұмсаса, жылына 45 миллион көлік шығара алатыны анықталған.

Шетелдегі өндіріс мүмкіндіктері

Кеден алымдары мен транспорт шығындарын қысқарту үшін, қытайлар шетелде өндіріс орындарын ашуды жоспарлап отыр. Мәселен, BYD қазіргі кезде Таиланд пен Өзбекстанда авто құрастыруда, ал жақын арада Бразилия, Индонезия, Венгрия, Түркия және Мексика елдерінде де өндірісті ұйымдастыруды көздеп отыр. Chery, Great Wall, SAIC және Changan да осы бағытта жұмыс жасауға дайындалып жатыр.

Мамандар 2024 жылы шетелдерде 2.5 миллион Қытай автокөліктері шығатынын атап өтті.

Қазақстандағы Қытай автоөндірісі

Қытайдың автомобильдері Қазақстанда да сұранысқа ие. 2024 жылдың қорытындысы бойынша, ресми автонарықта үздік 10 марканың алтауы – Қытай брендтері. Кейбір автоөндірушілер, мысалы, JAC, Jetour, және Hongqi, бүгінде елімізде көлік құрастырып жатыр. Сонымен қатар, Kaiyi, Changan, Chery және Tank Қазақстанда өндіріс орнын ашуға ниетті. Ал Haval да осы қатарға қосылу мақсатын көздеген.

Нарықтағы танымалдық

Қытай машиналары жеке нарықта да үлкен сұранысқа ие. Мәселен, Kolesa.kz платформасында сатылып жатқан 6.7 мың жаңа автомобильдің 3 мыңнан астамы Аспан асты елінің өнімдері болып табылады.