Қазақстан мен Қытайдың астық сапасын анықтау орталығы ашылды

18 маусымда С. Сейфуллин атындағы Қазақ агротехникалық ғылыми-зерттеу университетінің базасында Қазақстан-Қытай инновациялық астық сапасын анықтау орталығы ашылды. Орталық Солтүстік-Батыс ауылшаруашылық және орман шаруашылығы университетімен (Қытай Халық Республикасы) ынтымақтастықта құрылды, - деп хабарлайды eldala.kz тілшісі.

Орталықтың құрылу мақсаты – астық сапасын талдау мен бағалау саласында заманауи технологиялар мен ғылыми әдістерді енгізу, сондай-ақ Қазақстанның аграрлық ғылымы мен экспорттық әлеуетін дамыту.

Орталықтың негізгі қызмет бағыттары:

• астық пен астық өнімдерін жоғары дәлдікте зерттеу жүргізу;
• қытайлық және халықаралық сапа стандарттарын енгізу;
• астық саласы үшін цифрлық шешімдерді дамыту;
• мамандарды оқыту және біліктілігін арттыру;
• Қазақстандық астық экспортын халықаралық нарықтарға қолдау көрсету.

Орталық Қазақстан мен Қытай арасындағы ғылыми-техникалық алмасу, бірлескен әзірлемелер мен аграрлық серіктестікті нығайту үшін маңызды алаңға айналады, - деп атап өтті КазАТИУ.