Қазақстанда құс етін өндіру көлемі 9,4% артты

Қазақстанда 2024 жылдың қаңтарынан қарашаға дейін құс етін өндіру көлемі 2023 жылдың осы кезеңімен салыстырғанда 9,4% артқан. Осы уақыт ішінде отандық кәсіпорындар 326,3 мың тонна өнім шығарған - деп хабарлайды eldala.kz тілшісі.

Экспорттық көрсеткіштердің артуы

2024 жылдың он бір айында құс етінің экспорты 34,2% өсті. Шетелге 38 мың тонна өнім жөнелтілді, ал өткен жылдың дәл осы кезеңінде экспорт 28,3 мың тонна болды.

Импорт көрсеткіштері

Импорт 10,7% төмендеді. Аталған кезеңде елімізге 121 мың тонна өнім әкелінді.

Ішкі нарықтағы жағдай

Қазақстанның ішкі нарығында 2024 жылдың 11 айында 409,3 мың тонна құс еті сатылды, бұл 2023 жылдың сәйкес кезеңімен салыстырғанда 1% көп (405,4 мың тонна).

Болашақ жоспарлар

Қазақстан алдағы бірнеше жылда құс етін импорттауға тәуелділіктен арылып, оны экспорттайтын мемлекет болуды жоспарлап отыр. Осының аясында вице-премьер Серік Жуманғариннің айтуынша, республикада 30-дан астам құс фабрикасын салу бойынша жобалар жүзеге асырылуда.