Жанибек Алимханулы наурызда рингке оралады

Қазақстандық әлем чемпионы Жанибек Алимханулының (16-0, 11 КО) рингке оралу мерзімі белгілі болды, деп хабарлайды vesti.kz. Brunch Boxing-тің ақпаратынша, Алимханулы келесі жекпе-жегін наурызда өткізіп, ESPN арнасындағы Top Rank ұйымдастырған боксерлік кештің басты жұлдызы болады. Жекпе-жек туралы толық ақпарат кейінірек жарияланады.

Қазақстандық боксшы WBO бойынша міндетті үміткер британдық Хамза Шираздың (21-0, 17 KO) жекпе-жектен бас тартуына байланысты қарсылас іздеуге мәжбүр болды. Наурыздағы жекпе-жектен кейін Алимханулы WBA ұйымының орта салмақ чемпионы кубалық Эрисланди Ларамен (31-3-3, 19 КО) немесе 22 ақпанда өтетін доминикандық Карлос Адамес (24-1, 18 КО) мен жоғарыда аталған Хамза Шираз арасындағы жекпе-жектің жеңімпазымен бірігу жекпе-жегіне қатысуға үміттенеді.

Алимханулы соңғы жекпе-жегін 2024 жылдың 4 қазанында Сиднейде (Австралия) өткізіп, тоғызыншы раундта жаңозеландиялық Андрей Михайловичті (21-1, 13 КО) нокаутпен жеңіп, қарсыласына мансабындағы алғашқы жеңілісін сыйлады.