Льеж соты Урсула фон дер Ляйеннің жемқорлыққа қатысты иммунитет мәселесін қарастырады

Льеж соты Еуропа комиссиясының (ЕК) басшысы Урсула фон дер Ляйеннің COVID-19 вакциналарын сатып алу кезінде жемқорлыққа қатысты айыптаулардан иммунитеті мәселесін қарастырады. Бұл жөнінде бельгияндық белсенді Фредерик Бальдан хабарлады, деп жазады ТАСС.

Ол 6 қаңтарда Еуропа прокуратурасының өтінішіне байланысты соттың отырысы өтетінін атап өтті. Алайда, ведомство Еуропадағы жемқорлық фактілерін анықтауды жоспарлағанымен, қазіргі уақытта де-факто фон дер Ляйенді қорғап отыр.

«Еуропа прокуратурасы сотқа өтініш жіберіп, фон дер Ляйеннің клиникалық сынақтардан өтпеген COVID-19 вакциналарын сатып алу кезінде жемқорлық бойынша сотқа тартуға қарсы иммунитеті бар деп мәлімдеді», - деді Бальдан.

Бальдан, сондай-ақ, ЕК басшысының ұзақ уақыт бойы рұқсат етілген шектерді асырғанын және айыптаулардан иммунитетке үміттене алмайтындығын қосты.

Бұған дейін поляк фермерлері Варшавадағы Еуропа комиссиясының өкілдігі алдында наразылық акциясына шыққан болатын. Олар ЕК басшысы Урсула фон дер Ляйенге қарсы шықты.