Венецияда жаңа Alfa Romeo GT Super рестомодының тұсауы кесілді

Венециядағы Totem Automobili шеберханасы GT Super рестомодын одан әрі жетілдіруде. Бұл көліктің соңғы нұсқасы 1972 жылы European Touring Car Championship кубогында Jarama трассасында жеңіске жеткен Alfa Romeo GTA Junior 1300-дің құрметіне жасалған.

GT Super Jarama-ның шанағы көміртекті пластиктен, шассиі алюминийден жасалған. Ол Blu Cervino деп аталатын қанық көк түске боялып, фирмалық эмблема алды. Интерьері толығымен Connolly Cognac былғарысымен қапталып, анодты алюминий мен карбон ендірмелерімен әрленген. Екі винтажды Tag Heuer хронографы мен механизмі көрінетін беріліс қорабы иінтірегінің тұтқасы жарыс дәуірін еске түсіреді.

Машинада Italtecnica әзірлеген 2.8 литрлік екі турбиналы V6 орнатылған. Оның әр цилиндрі төрт клапаннан, алты жеке дросселі бар. Минутына 7200 айналым жасай алатын мотордың қуаты 591 ат күшіне жетеді. Алты сатылы механикалық қорабы 700 Нм моментті бұғатталатын дифференциал арқылы тек артқы дөңгелектерге береді. Қуаттырақ түрі 739 ат күшіне ие (850 Нм).

GT Super-дің тек 40 данасы жарық көреді, бірақ Jarama модификациясымен қанша экземпляр шығатыны белгісіз. Totem Automobili де бұл сұрақтың жауабын білмейтін шығар, себебі ол 539 мың еуро тұратын көлікке тапсырыс беретіндердің санына байланысты.