Қазақстан криптовалюта табысын салықтан босатуды жоспарлап отыр

Қазақстанда цифрлық активтердің реттелетін нарығын құру, стейблкоиндерді трансшекаралық есеп айырысуда пайдалану және криптовалютадан түскен табысқа салықтық жеңілдік беру жоспарланып отыр. Президент Қасым-Жомарт Тоқаев 7 шілдеде цифрлық активтер индустриясын дамыту туралы жарлыққа қол қойды, деп хабарлады Ақорда.

Құжатты Жасанды интеллект және цифрлық даму министрлігі, Ұлттық банк, салалық мемлекеттік органдар және «Астана» халықаралық қаржы орталығы бірлесіп әзірлеген. Негізгі мақсаттың бірі криптоактивтермен жасалатын операцияларды бақылаусыз алаңдардан Қазақстанның реттелетін инфрақұрылымына көшіру.

Криптовалюта табысына салықтық жеңілдік берілуі мүмкін

Жарлық аясында жеке тұлғаларға арналған салықтық ынталандыру шаралары қарастырылады. Қазақстанның реттелетін инфрақұрылымы арқылы жасалған цифрлық актив операцияларынан түскен табысты жеке табыс салығынан босату жоспарланып отыр.

Бұл жеңілдік кез келген криптовалюта операциясына автоматты түрде қолданылмайды. Министрліктің түсіндірмесіне сәйкес, операция қазақстандық реттелетін алаң арқылы жүргізілуі керек.

Шетелдегі реттелмейтін платформаларда сақталған цифрлық активтерді ерікті түрде жария етуге де жағдай жасалмақ. Одан кейін мұндай активтерді отандық провайдерлердің платформаларына көшіру ұсынылады. Активтерді жария ету тәртібі мен оған қойылатын талаптар кейінгі құжаттарда нақтылануы тиіс.

Стейблкоиндер сыртқы сауда төлемдеріне қолданылмақ

Қазақстан цифрлық активтер мен стейблкоиндерді трансшекаралық есеп айырысу кезінде қолдану тетіктерін әзірлемек. Бұл қазақстандық компанияларға экспорттық және импорттық операциялар бойынша төлем жүргізудің қосымша арналарын ашуы мүмкін.

Стейблкоин дегеніміз көбіне доллар, еуро немесе басқа дәстүрлі валюта бағамына байланыстырылған цифрлық актив. Оның бағасы кәдімгі криптовалюталарға қарағанда тұрақтырақ болуы мүмкін. Дегенмен жарлық стейблкоиндермен төлем жасауды бірден бастамайды, алдымен оны пайдалану тәртібі, бақылау талаптары және рұқсат етілетін платформалар белгіленуі керек.

Ілеспе газдан өндірілген энергия майнингке жұмсалады

Құжатта мұнай және газ кен орындарындағы ілеспе газды тиімді пайдалану тетігі де қарастырылған. Мемлекеттік қажеттіліктерге керек болмаған жағдайда, ілеспе мұнай газы мен табиғи газдан автономды түрде электр энергиясын өндіруге мүмкіндік беріледі.

Өндірілген энергия цифрлық майнингке бағытталуы мүмкін. Бұл майнинг кәсіпорындарының жалпы электр желісіне түсіретін жүктемесін азайтып, кен орындарында толық пайдаланылмай жатқан энергетикалық ресурстарды іске жаратуға мүмкіндік береді.

Жарлық токенделген қаржы құралдары мен ұлттық сауда инфрақұрылымын дамытуға да бағытталған. Бастамаларды іске асыру мерзімдері, жауапты мемлекеттік органдар және нақты талаптар арнайы іс-шаралар жоспарында бекітіледі.