Қазақстандық балалар Ұлттық қордан 97,5 млн доллар алды

«Ұлттық қор – балаларға» бағдарламасы бойынша 435 мыңнан астам қазақстандық 97,5 млн доллар алды. Жинақты қалай тексеруге және пайдалануға болады?

👁️ 2
«Ұлттық қор – балаларға» бағдарламасы бойынша балаларға жиналған қаражатты тексеру
Сурет: GPT

Қазақстанда «Ұлттық қор – балаларға» бағдарламасы арқылы 435 046 адам жинақталған қаражатын пайдаланды. 2024 жылғы 1 ақпаннан 2026 жылғы 1 қарашаға дейін оларға жалпы сомасы 97,52 млн доллар төленген. Бұл туралы Бірыңғай жинақтаушы зейнетақы қоры (БЖЗҚ) хабарлады.

Қаражаттың басым бөлігі тұрғын үй жағдайын жақсартуға жұмсалған. Осы мақсатта 286 548 адамға 63,82 млн доллардан астам қаржы аударылды. Ал білім алу үшін 148 498 қазақстандық 33,69 млн доллар пайдаланған.

Тек 2026 жылдың алғашқы он айында 239 649 адамға 66,24 млн доллар төленді. Оның 44,39 млн доллары тұрғын үйге, 21,85 млн доллары білім алуға бағытталған.

Ұлттық қордағы ақшаны көбіне неге жұмсайды?

Тұрғын үй бағыты бойынша ең көп сұранысқа ие қызмет тұрғын үй құрылыс жинақ салымын толықтыру болды. Бұл мүмкіндікті 162 626 адам пайдаланып, олардың шоттарына 43,73 млн доллар аударылған.

Бұдан бөлек, 1001 адам ипотеканың бастапқы жарнасына 244,2 мың доллар, ал 576 адам тұрғын үйді сатып алудың түпкілікті есеп айырысуына 141,19 мың доллар жұмсаған.

Білім алуға бағытталған қаражаттың негізгі бөлігі Қазақстандағы оқу орындарының ақысын төлеуге пайдаланылды. Осы мақсатта 70 655 адамға 20,62 млн доллар берілген.

Тағы 3287 қазақстандық білім беру жинақ салымына 868,14 мың доллар аударған. Ал шетелдік оқу орындарында білім алу үшін 1071 адам 282,76 мың доллар пайдаланған.

Балалардың Ұлттық қордағы жинағы қаншаға жетті?

Бағдарлама бойынша 18 жасқа толмаған балалардың әрқайсысына Ұлттық қордың инвестициялық кірісінен жыл сайын ақша есептеледі.

2023 жылдың қорытындысы бойынша әр балаға 100,52 доллар, 2024 жылы 129,38 доллар, ал 2025 жылы 130,71 доллар есептелген.

Жинақталған қаражат инвестициялануын жалғастыратындықтан, оған қосымша табыс түседі. Соның нәтижесінде 2026 жылғы есепте көрсетілген жалпы жинақ мөлшері:

  • Үш жыл қатысқан балаларда: 370,56 доллар;
  • Екі жыл қатысқан балаларда: 263,93 доллар;
  • Бір жыл қатысқан балаларда: 130,71 доллар.

Бұл сомалар бағдарламаға қатысу мерзіміне байланысты қалыптасқан. Ақша бала 18 жасқа толғанға дейін Ұлттық қор активтерінің құрамында инвестициялана береді.

Баланың шотында қанша ақша барын қалай тексеруге болады?

Ата-аналар баласының жинағын оның жеке сәйкестендіру нөмірі (ЖСН) арқылы тексере алады. Ақпарат бірнеше жерде қолжетімді:

  • kids.enpf.kz сайтында;
  • eGov.kz порталындағы жеке кабинетте;
  • eGov Mobile қосымшасында;
  • кейбір екінші деңгейлі банктердің мобильді қосымшаларында.

Егер 2025 жыл үшін есептелген қаражат көрсетілмесе, мобильді қосымшадағы құжаттар тізімін жаңарту қажет.

Мысалы, eGov Mobile қосымшасында «Цифрлық құжаттар» бөліміне кіріп, «Отбасы» санатынан құжаттар тізімін жаңартуға болады. Kaspi.kz қосымшасында да мемлекеттік қызметтер бөліміндегі құжаттарды жаңарту мүмкіндігі бар.

БЖЗҚ түсіндіргендей, 2026 жылы 18 жасқа толған немесе толатын балалардың жинағы ата-анасының жеке кабинетінде көрінбеуі мүмкін. Себебі мұндай қаражат нысаналы жинақ мәртебесіне өтеді және ол туралы ақпаратты алушының өзі қарай алады.

18 жасқа толғаннан кейін ақшаны қалай алуға болады?

Бағдарлама қатысушысы 18 жасқа толған соң жинағын тұрғын үй жағдайын жақсартуға немесе білім ақысын төлеуге пайдалана алады.

Ол үшін уәкілетті операторға жүгініп, АҚШ долларындағы банк шотын ашу және онлайн өтініш беру қажет.

Қазіргі уақытта бағдарлама бойынша үш банк қызмет көрсетеді:

  • Отбасы банк: тұрғын үй және білім алу мақсаттарына;
  • Halyk Bank: білім алу мақсаттарына;
  • Банк ЦентрКредит: білім алу мақсаттарына.

Жинақтың барлығын бірден пайдалану міндетті емес. Қажетті бөлігін ғана жұмсауға болады.

Пайдаланылмаған ақша нысаналы жинақтау шотында 10 жыл сақталады. Осы мерзім аяқталғаннан кейін қалған сома ерікті зейнетақы жарналарын есепке алу үшін алушының жеке зейнетақы шотына аударылады.

БЖЗҚ дерегінше, 2026 жылғы 1 қарашаға дейін қайтыс болған бағдарлама қатысушылары мен алушылардың мұрагерлеріне де төлем жасалған. Барлығы 249 адамға 80,55 мың доллар аударылған.