Қазақстанда жыл соңына дейін 1,6 мың ауылға интернет жеткізу жоспарланып отыр

Қазақстанда 2026 жылдың соңына дейін 1 600 ауылды интернетке қосу жоспарланып отыр. Қазірдің өзінде 370 ауылға байланыс жеткізіліп, 11 819 шақырым желі тартылған. Бұл туралы 6 қазанда Үкімет отырысында Премьер-министрдің орынбасары, жасанды интеллект және цифрлық даму министрі Жаслан Мадиев мәлімдеді.

Министрдің айтуынша, ауылдық жерлерді интернетпен қамту жұмыстары жыл соңына дейін жалғасады.

Ауылдық жерлерде 370 ауыл қосылды. Биылғы жоспар 1,6 мың ауылды қамтиды. Барлығы 11 819 шақырым байланыс желісі тартылды.

Ауылдарға жоғары жылдамдықты интернет жеткізілмек

Қазақстанда ауылдық елді мекендерді сапалы интернетпен қамту бірнеше ірі жоба арқылы жүзеге асырылып жатыр. Соның бірі ауылдарға талшықты-оптикалық байланыс желілерін жеткізуді көздейді.

Бұған дейін Үкімет 2027 жылдың соңына дейін 3 мыңнан астам ауылды жоғары жылдамдықты интернетпен қамтамасыз ету жоспарланғанын хабарлаған. Жоба 1,2 млн адам мен 5,8 мың мемлекеттік нысанды қамтуы тиіс.

Сонымен қатар интернеттің «соңғы милін» дамыту жобасы жүзеге асырылып жатыр. Оның мақсаты байланыс желісін елді мекенге дейін ғана емес, тұрғын үйлерге дейін жеткізу.

2027 жылы 40 мың шақырым жолды байланыспен қамту көзделген

Цифрлық инфрақұрылымды дамыту тек ауылдармен шектелмейді. Жаслан Мадиевтің мәліметінше, 2027 жылы республикалық және облыстық маңызы бар 40 мың шақырым автожолды байланыспен қамту жоспарланған.

Ол үшін жол бойында 500-ден астам антенна-діңгек құрылысы орнатылуы тиіс. Бұл елді мекендер арасындағы жолдарда мобильді байланыстың қолжетімділігін арттыруға мүмкіндік береді.

Қазақстанда «Қолжетімді интернет» ұлттық жобасының негізгі мақсаттарының бірі - қалалар мен ауылдар арасындағы цифрлық алшақтықты азайтып, тұрғындарға тұрақты әрі жоғары жылдамдықты интернетке қолжетімділік беру.