Қазақстанда eGov GPT арқылы көрсетілетін қызметтер саны 150-ге жетеді

Қазақстанда eGov GPT цифрлық ассистенті арқылы көрсетілетін мемлекеттік қызметтер санын 2026 жылдың соңына дейін 150-ге жеткізу жоспарланып отыр. Қазір сервис арқылы 50-ден астам қызмет қолжетімді, яғни олардың саны үш есеге жуық артады.

Бұл туралы цифрландыру және жасанды интеллект саласындағы мемлекеттік жобаларды іске асыру барысында айтылды. Жоспар бойынша eGov GPT-ке азаматтар жиі пайдаланатын қызметтер қосылады.

eGov GPT арқылы қандай қызметтер қолжетімді болады?

Негізгі мақсат - мемлекеттік қызметті іздеу мен өтініш беруді жеңілдету. Пайдаланушы қажетті қызметтің нақты атауын білмесе де, eGov GPT-ке өзіне не қажет екенін қарапайым тілмен жаза алады.

Цифрлық ассистент сұранысты талдап, тиісті қызметті анықтауға, өтінішті рәсімдеуге және қажетті әрекеттерді орындауға көмектеседі.

Жыл соңына дейін жүйеге ең көп сұранысқа ие 150 мемлекеттік қызметті қосу көзделген. Олар азаматтардың мемлекеттік сервистерге жүгінуінің басым бөлігін қамтуы тиіс.

Қазақстан мемлекеттік қызметтерді ЖИ арқылы өзгертпек

eGov GPT электрондық үкіметті жаңғыртудың бір бөлігі саналады. Қазақстанда мемлекеттік цифрлық жүйелер QazTech бірыңғай платформасына көшіріліп, eGov 3.0 экожүйесі дамытылып жатыр.

Жасанды интеллект азаматқа қажетті қызметті өзі іздеп табуға ғана емес, өтініш беру процесіндегі артық қадамдарды азайтуға көмектесуі тиіс.

Бұған дейін Үкімет сұранысқа ие қызметтерді цифрландыру нәтижесінде халықтың ХҚКО-ға жүгінуі шамамен 30 пайызға азайғанын хабарлаған.

Алдағы жылдары жасанды интеллектінің мемлекеттік қызметтердегі үлесін одан әрі арттыру жоспарланып отыр. 2029 жылға қарай мемлекеттік қызметтердің кемінде 40 пайызын ЖИ мен автоматтандыру технологияларын пайдалана отырып өзгерту көзделген.