Қазақстанда медицина қызметкерлерін жұмыстағы шабуылдан сақтандырады

Қазақстанда 2027 жылғы 1 қаңтардан бастап медицина қызметкерлерін сақтандыру жүйесі кеңейеді. Дәрігер, медбике немесе басқа медицина қызметкері жұмыс кезінде бөгде адамның зорлық-зомбылығынан зардап шексе, оның өмірі мен денсаулығына келтірілген зиян сақтандыру жағдайы ретінде қарастырылады. Денсаулық сақтау министрлігі осы өзгерістерге байланысты медицина қызметкерлерін сақтандыру қағидаларын жаңартуды ұсынып отыр.

Жаңа тәртіп 2026 жылдың жазында Денсаулық кодексіне енгізілген өзгерістерге байланысты әзірленген. Негізгі нормалар 2027 жылғы 1 қаңтардан бастап күшіне енеді.

Медицина қызметкерлеріне екі бағыт бойынша қорғаныс беріледі

Қазір міндетті сақтандыру жүйесі негізінен медицина қызметкерінің пациенттің өміріне немесе денсаулығына зиян келтірген жағдайдағы кәсіби жауапкершілігін қамтиды.

2027 жылдан бастап жүйеде екі сақтандыру шарты қарастырылады:

• медицина қызметкерлерінің кәсіби жауапкершілігін сақтандыру;
• кәсіби міндетін атқару кезінде медицина қызметкерінің өмірі мен денсаулығын сақтандыру.

Екінші бағыт дәрігердің, медбикенің немесе басқа медицина қызметкерінің жұмыс кезінде үшінші тұлғалардың күш қолдану әрекетінен зардап шеккен жағдайларына арналған.

Шабуыл сақтандыру жағдайы болып есептеледі

Медицина қызметкерінің кәсіби міндетін атқару кезінде бөгде адамның зорлық-зомбылығы салдарынан өміріне немесе денсаулығына зиян келуі сақтандыру тәуекеліне жатады.

Мұндай оқиға уақытша еңбекке жарамсыздыққа, мүгедектікке немесе медицина қызметкерінің қайтыс болуына әкелсе, зиян келтіру фактісі Қазақстан заңнамасына сәйкес расталуға тиіс.

Сақтандыру төлеміне медицина қызметкерінің өзі, ал заңда көзделген жағдайларда оның жақын туыстары өтініш бере алады. Өтініш бірыңғай сақтандыру немесе қайта сақтандыру пулына жіберіледі.

Қанша төлем қарастырылған

Сақтандыру төлемінің мөлшері Денсаулық кодексінің 270-4-бабында белгіленген шкала бойынша есептеледі:

• III топтағы мүгедектік белгіленсе, кемінде 500 АЕК;
• II топтағы мүгедектік белгіленсе, кемінде 600 АЕК;
• I топтағы мүгедектік белгіленсе, кемінде 800 АЕК;
• медицина қызметкері қайтыс болса, кемінде 3000 АЕК;
• денсаулыққа зиян келіп, бірақ мүгедектік белгіленбесе, 300 АЕК.

Бұл сомаларды әзірге 2027 жылғы теңгемен есептеу дұрыс емес. Төлем мөлшері тиісті қаржы жылының 1 қаңтарында қолданылатын айлық есептік көрсеткішке байланысты болады.

Сақтандыруды жұмыс беруші төлейді

Медицина қызметкері мұндай сақтандыру үшін өз қалтасынан ақша төлемейді. Міндет денсаулық сақтау субъектісіне, яғни медицина ұйымына жүктеледі.

2027 жылғы 1 қаңтарға дейін қазіргі міндетті кәсіби жауапкершілікті сақтандыру тәртібі қолданыла береді. Жаңа нормалар күшіне енгеннен кейін жүйе пациентке келтірілген зиянды өтеумен қатар, жұмыс кезінде зорлық-зомбылықтан зардап шеккен медицина қызметкерінің өзін де қаржылай қорғауға тиіс.