ЧМ-2026 алаңын қаздардан екі ит қорғап жүр

Торонтода 2026 жылғы футболдан әлем чемпионатына дайындық жүріп жатқан алаңдардың бірін екі бордер-колли қорғап жүр. Бен мен Салли есімді иттер Centennial Park аумағындағы жаттығу алаңынан канадалық қаздарды қуып, газонды футболшыларға жарамды күйде сақтауға көмектеседі, деп жазады Reuters.

Бұл алаңды Торонтоға матчтарға келген құрамалар жаттығу үшін пайдаланады. Ал жергілікті қаздар үшін ол жай ғана кең, жасыл әрі қолайлы орын. Сондықтан ұйымдастырушыларға алаңды құстардан тұрақты қорғауға тура келген.

Мәселе сырттай күлкілі көрінгенімен, спорт нысаны үшін маңызды. Канадалық қаздар ашық жасыл аймақтарды тез иемденіп алады, кейде агрессивті болуы мүмкін. Ең бастысы, олардың саңғырығы газонды бүлдіріп, ойын жабынының сапасына әсер етеді.

Бен мен Салли алаңды күніне екі рет тексереді

Reuters дерегінше, иттер алаңға аптасына бес күн, күніне екі рет шығады. Құстар қайта оралса, олар қосымша да шақырылуы мүмкін.

Бен сегіз жаста, бұл жұмыста тәжірибесі мол. Ол алаңды бақылап, қаз көрінсе бірден әрекет етеді. Салли екі жарым жаста ғана, бірақ дрессировщик Спенсер Джонстың айтуынша, сигнальды жилет киген сәттен бастап жұмыс режиміне көшеді.

Border Control Bird Dogs компаниясының иесі Гарет Уильямс бордер-коллилер мұндай міндетке өте қолайлы дейді. Олар ұзақ уақыт қозғалыста болып, алаңды бақылаудан жалықпайды.

Неге техника емес, иттер таңдалды

Бұл әдістің мақсаты қаздарға зиян келтіру емес. Иттер құстарға қауіп бар деген белгі береді, сол арқылы олар алаңнан кетеді және бұл жерді тұрақты мекенге айналдырмайды.

Border Control Bird Dogs Онтариодағы саябақтарда, ауруханалар маңында, зираттарда және гольф алаңдарында қаздарды жасыл аймақтардан алыстату қызметімен бұрыннан айналысады. Бірақ әлем чемпионаты бұл жұмысты көпшілікке ерекше көрсетіп берді.

Бен мен Саллидің оқиғасы үлкен турнирге дайындық тек стадион, билет пен трансляциядан тұрмайтынын аңғартады. Кейде футбол алаңының сапасы күн сайын газонды аралап, қаздарды аңдып жүретін екі итке де байланысты болады.