Хабарламаңызды көгершін жеткізеді: Roost желісі 300 мың адам жинады

АҚШ-та хабарламаларды бірден емес, виртуалды құстардың ұшу жылдамдығымен жеткізетін Roost әлеуметтік желісі танымал болды. Жеке жоба ретінде басталған қосымша бес апта ішінде 300 мыңға жуық қолданушы жинады, деп хабарлайды TechCrunch.

Roost кәдімгі мессенджерлерден әдейі баяу жұмыс істейді. Қолданушы мәтін жазады, оны жеткізетін құсты таңдайды және виртуалды құстың карта бойымен адресатқа қарай ұшқанын бақылайды.

Хабарлама бірнеше күн жолда болуы мүмкін

Хаттың жеткізілу уақыты екі адамның арасындағы қашықтыққа және таңдалған құстың жылдамдығына байланысты. Жүйе хабарламаны жібермес бұрын сапардың қанша уақыт алатынын көрсетеді.

Әр құс табиғаттағы нақты түрінің шамамен ұшу жылдамдығына сәйкес қозғалады. Мысалы, сұңқар колибриге қарағанда хабарламаны жылдамырақ жеткізеді. Асықпайтын қолданушылар хатты ұлу немесе тасбақа арқылы да жібере алады.

Ұшу кезінде хабарламаның бағыты картадан көрінеді. Қашықтық аз болса, хат бірнеше сағатта жетуі мүмкін. Басқа қалаға немесе елге жіберілген хабарлама бірнеше күн бойы жолда болады.

Roost анықтамасында қолданушы алдымен досын қосатыны немесе белгісіз адаммен хат алмасуға арналған Pen Pals жүйесіне қосылатыны жазылған. Бұдан кейін хабарлама жазып, бос тұрған құстардың бірін таңдау керек.

Қосымша үш күнде он есе өскен

Roost жобасын Ticketmaster компаниясының қауіпсіздік бөлімінде өнім менеджері болып жұмыс істейтін Логан Мендельсон жасаған. Бастапқыда ол қосымшаны достарымен көңіл көтеру үшін бос уақытында әзірлеген.

Жобаға қызығушылық Threads желісінде жарияланған жазбадан кейін күрт артты. Бір ана қызының достарымен көне ағылшын тілінде сөйлесіп, хабарламаларды шынайы құстардың жылдамдығымен жіберетін қосымшаны қолданатынын жазған.

Осы жарияланымнан кейін Roost қолданушыларының саны үш күнде 10 мыңнан 100 мыңға дейін өскен. Шамамен бес аптадан соң аудиториясы 300 мың адамға жуықтады.

Мақсат адамдарды асықпай сөйлесуге үйрету

Roost авторының айтуынша, қазіргі телефондағы барлық әрекет жылдам орындалады және қолданушылар үнемі жаңа хабарлама күтеді. Ал құстың ұшып жетуін күту бірден жауап беру қысымын азайтып, адамның не жазатынына көбірек мән беруіне көмектеседі.

Қосымшада жаңалықтар лентасы мен шексіз айналдыру жүйесі жоқ. Қолданушылар достарымен сөйлеседі, құстар жинайды және оларды шағын ойындар арқылы жаттықтырады. Жаттығудан кейін құстың жылдамдығы артып, келесі хаттарды ертерек жеткізе алады.

Roost-та 11 адамға дейін қатыса алатын топтық чаттар да бар. Топқа жіберілген хабарламаны құс әр қатысушының виртуалды ұясына жеткізеді. Құстар жаңа елге алғаш рет ұшып барғанда олардың цифрлық төлқұжатына белгі қойылады.

Нақты мекенжай барлық адамға көрсетілмейді

Қосымша карта мен орналасқан жер туралы мәліметті пайдаланғандықтан, әзірлеуші құпиялыққа арналған бірнеше шектеу енгізген. Әдепкі баптауда достарға қолданушының нақты мекенжайы емес, тек қаласы көрінеді.

Нақты геолокацияны арнайы таңдалған жақын достарға ғана ашуға болады. Белгісіз адамдармен хат алмасатын Pen Pals бөлімінде телефон нөмірі мен жеке ақпаратты жарияламау туралы ескерту беріледі.

Қосымшада әзірге фотосурет жіберу мүмкіндігі жоқ. Мендельсон мұндай функцияны контентті тексеруге арналған толыққанды құралдар дайын болғаннан кейін ғана қосуды жоспарлап отыр.

Roost сыртқы инвестиция тартпаған. Жоба қосымша құстарды және басқа виртуалды заттарды сатып алудан табыс табады. App Store мәліметінше, қосымша тегін таратылады және iPhone-ға арналған нұсқасы бар.