Адам қолына ұқсас робот саусақтары жүзім теріп, шам бұрай алады

Норвегиялық-америкалық 1X компаниясы NEO үй роботына адам қолының қозғалысын қайталайтын жаңа бес саусақты қол орнатты. Робот енді шам бұрап, ұсақ тиынды көтеріп, жүзімді сұрыптап, киімнің сыдырмасын жаба алады.

Компания жаңа қолдың техникалық мүмкіндіктерін 9 шілдеде таныстырды. Әзірлеушілердің айтуынша, бұл шешім роботтарға үйдегі күрделі әрі ұқыптылықты қажет ететін жұмыстарды орындауға көмектеседі.

Робот қолы адамдікіне ұқсас жасалған

NEO қолында 25 қозғалыс еркіндігі бар. Оның 22-сі саусақтар мен алақанға, тағы үшеуі білекке тиесілі. Салыстыру үшін адамның қолында шамамен 27 қозғалыс еркіндігі болады.

Роботтың қозғалтқыштары саусақтың ішінде емес, білегінде орналасқан. Олар адамның сіңіріне ұқсайтын арнайы тартқыштар арқылы саусақтарды қозғалтады. Мұндай құрылым қолды жеңіл әрі икемді етуге мүмкіндік берген.

Саусақтар күш түскен кезде қозғалыс бағытын өзгертіп, заттың қаншалықты қатты қысылғанын анықтай алады. Егер қолға ұсталған зат сырғи бастаса, робот оны сезіп, саусақтарының қысымын реттейді.

Саусақ ұштары жанасуды сезеді

NEO саусақтарының ұшы мен сыртқы бетіне сезімтал датчиктер орнатылған. Олар қысымды, жанасқан нүктені және заттың қозғала бастағанын анықтайды.

Компанияның бейнежазбасында роботтың ұсақ бұрандаларды көтеріп, әмияннан тиын алғаны, LEGO бөлшектерін құрастырғаны және электр шамын орнына бұрағаны көрсетілген. Ол бұрауыш қолдана алады, шәйнектен шай құяды, USB-C кабелін жалғайды және қағаз сүлгімен үстел сүртеді.

NEO нәзік заттармен де жұмыс істей алады. Робот жүзімді сабағынан ажыратып, шарап бокалын ұстап, жұқа қағаздан жасалған оригамиді зақымдамай көтерген.

Қолын сумен жуа алады

Робот қолы IP68 стандарты бойынша су мен шаңнан қорғалған. Қолданылған материалдар тағаммен жанасуға жарамды деп көрсетілген, сондықтан NEO раковинада жұмыс істеп, қолын өзі жуа алады.

Саусақтардың орналасу дәлдігі шамамен 0,2 миллиметрге жетеді. Компания толық қол мен оның жекелеген бөлшектерін миллиондаған қозғалыс циклі арқылы сынағанын мәлімдеді.

1X биыл жаңа қолдардың 10 мың данасын өндіруге жететін қуаты бар екенін хабарлады. Жүздеген қол өндіріс желісінен шығып үлгерген.

Робот әзірге барлық жұмысты өзі істемейді

Жарнамалық бейне NEO қолының механикалық мүмкіндігін көрсетеді, бірақ роботтағы барлық әрекет толықтай жасанды интеллект арқылы орындалмайды. WIRED мәліметінше, кейбір көріністер автоматты түрде орындалса, кейбірін оператор басқарып, құрылғы мүмкіндігінің шегін көрсеткен.

Күрделі тапсырма кезінде 1X маманы роботқа қашықтан қосылып, оның әрекетін басқара алады. Компания бұл режим тек иесінің рұқсатымен және алдын ала белгіленген уақытта қосылатынын айтады.

Алғашқы сатып алушыларға робот қарапайым дербес мүмкіндіктермен жеткізіледі. Жаңа тапсырмаларды орындау қабілеті бағдарламалық жаңартулар мен жиналған тәжірибе арқылы біртіндеп кеңейтіледі.

NEO қанша тұрады

NEO роботына алдын ала тапсырыс беруге болады. Құрылғыны толық сатып алу бағасы 20 мың доллар, тапсырысты бекіту үшін қайтарылатын 200 доллар депозит төленеді.

Компания роботты айына 499 долларға жазылым арқылы ұсынбақ. АҚШ-тағы алғашқы жеткізілімдер 2026 жылы басталады, алайда нақты күні әзірге жарияланған жоқ.

NEO үй шаруасына көмектесетін робот ретінде жасалған. Ол кір жинау, заттарды тасу, есік ашу, үстел сүрту және өздігінен қуаттау станциясына қосылу сияқты тапсырмаларды орындауға бейімделіп жатыр.