Мысырда Пентагонмен салыстырылған алып «Октагон» ашылды

Мысырдың жаңа әкімшілік астанасында 4 шілдеде «Октагон» мемлекеттік стратегиялық басқару орталығы ресми түрде ашылды. Президент Абдель Фаттах ас-Сиси іске қосқан кешен армияны басқару, мемлекеттік деректер алмасу және төтенше жағдайлар кезіндегі іс-қимылды үйлестірудің басты торабына айналмақ, деп хабарлайды Ahram Online.

Ашылу рәсіміне елдің саяси басшылығы, Қарулы күштердің жоғары қолбасшылығы, әл-Азхардың бас имамы Ахмед ат-Тайеб және Копт православие шіркеуінің басшысы II Тавадрос қатысты. Ас-Сиси орталықтың ашылғанын растайтын құжатқа қол қойып, кешен үстіне Қарулы күштердің туы көтерілді.

Президентті қарсы алу кезінде артиллериядан 21 дүркін салют атылды. Рәсімде Мысыр армиясының әскери және технологиялық мүмкіндіктері де таныстырылды.

Кешеннің аумағы 92 шаршы шақырымға жетеді

Мысырдың Мемлекеттік ақпарат қызметінің мәліметінше, стратегиялық және логистикалық кешен шамамен 22 мың феддан аумақты алып жатыр. Бұл шамамен 92 шаршы шақырымға тең. Жоба әртүрлі міндет атқаратын 13 стратегиялық және логистикалық аймаққа бөлінген.

Интернетте кешеннің аумағы 9 миллион шаршы метр деген мәлімет те тарады. Алайда ресми деректе шамамен 92 миллион шаршы метр көрсетілген. Бұл тек «Октагонның» орталық ғимараттары емес, бүкіл әскери, техникалық, тұрғын және логистикалық аумақтың көлемі екенін ескеру керек.

Орталық бөлік бір-бірімен жалғасқан сегіз сегізбұрышты ғимараттан тұрады. Оның ортасында елдің жоғары басшылығына арналған тағы екі құрылыс және негізгі командалық ғимарат орналасқан.

Кешен «Октагон» деген атауды сегізбұрышты сәулетіне байланысты алған. Жобаны таныстырған ресми фильмде сегіз саны Ұлы пирамиданың қырларымен және ислам сәулетіндегі сегіз ұшты өрнектермен байланыстырылған.

ЖИ мен қорғалған дата-орталықтар қолданылады

Орталық командалық ғимаратқа әскери бөлімдерден, министрліктерден, мемлекеттік мекемелерден және өңірлік басқару органдарынан ақпарат түсіп отырады. Жүйе деректерді нақты уақыт режимінде жинап, өңдеп, жауапты тұлғаларға жеткізуге арналған.

Кешен аумағында жерасты байланыс және деректерді сақтау орталықтары, бұлтты дата-орталықтар, жоғары жылдамдықты оптикалық желілер мен шифрланған сымсыз байланыс жүйелері орналастырылған. Спутниктік барлау, киберқауіпсіздік және құпия ақпаратты қорғау құралдары да қарастырылған.

Үлкен көлемдегі деректерді талдау үшін жасанды интеллект алгоритмдері қолданылады. Олар жиналған ақпаратты сұрыптап, командалық орталықтағы экрандарға шығарады және дағдарыс кезінде шешімді жылдам қабылдауға көмектеседі.

Мысыр билігінің мәліметінше, «Октагонның» өз электр станциялары, су жеткізу және салқындату жүйелері бар. Тұрғын және қызметтік нысандар кешеннің сыртқы инфрақұрылымдағы ақаулар кезінде де ұзақ уақыт жұмыс істеуіне мүмкіндік береді.

Ғимараттардың бір бөлігі жарылыс пен әуе шабуылының салдарын азайтатын қорғаныс шешімдерімен жабдықталған. Кешен әскери қауіп кезінде ғана емес, табиғи апаттар, ірі төтенше жағдайлар және мемлекеттік дағдарыстар кезінде де басқару орталығы ретінде пайдаланылмақ.

«Октагон» Пентагоннан шынымен сегіз есе үлкен бе

Жаңа кешен туралы жарияланымдарда оның АҚШ-тағы Пентагоннан сегіз есе үлкен екені жиі айтылады. Бірақ мұндай салыстыруда әртүрлі көрсеткіштер қатар қойылады.

АҚШ Қорғаныс ведомствосының мәліметінше, Пентагонның қызметтік аумағы шамамен 6,5 миллион шаршы фут немесе 604 мың шаршы метр. Бұл бір негізгі ғимараттың ішкі ауданы.

Ал «Октагонға» қатысты 92 шаршы шақырым деген көрсеткіш бүкіл жобаның жер аумағын қамтиды. Оған орталық штабтан бөлек 13 аймақ, техникалық ғимараттар, жолдар, қоймалар, тұрғын орындар және басқа инфрақұрылым кіреді.

Сондықтан екі нысанды тек бір сан арқылы салыстыру дұрыс емес. «Әлемдегі ең ірі әскери басқару орталығы» деген сипаттаманы да бірыңғай халықаралық рейтингтің қорытындысы емес, Мысырдың ресми дереккөздері қолданатын жоба сипаттамасы ретінде қабылдаған жөн.

«Октагонның» ашылуы Мысырдың негізгі мемлекеттік органдарын Каирден жаңа әкімшілік астанаға көшіру бағдарламасының бір бөлігі саналады. Министрліктердің жаңа қалаға кезең-кезеңімен көшуі 2023 жылы аяқталған. Енді әскери қолбасшылық, мемлекеттік байланыс және дағдарыстарды басқару жүйелері де бір қорғалған кешенге біріктірілді.