БҰҰ Алматыда жаңа Орталықты не мақсатта ашты?

Алматы маңызды халықаралық оқиғаның алаңына айналды — Тұрақты даму мақсаттары жөніндегі БҰҰ Өңірлік орталығының ресми ашылуы өтті. Шараға Қазақстан Президенті Қасым-Жомарт Тоқаев пен БҰҰ Бас хатшысы Антониу Гутерриш қатысты.

📍 Алматыдағы БҰҰ орталығының маңызы

Бұл орталық тұрақты дамуды насихаттауға, реформаларды қолдауға және аймақтық мәселелерді шешуге арналған платформа болады. Тоқаевтың айтуынша, орталық басқа ұйымдардың жұмысын қайталамай, Орталық Азия тұрғындарының нақты қажеттіліктеріне басымдық бермек.

Президент атап өткендей, орталықтың ашылуы — «Орталық Азияның ғаламдық аренадағы маңызы артып келе жатқанының айқын белгісі».

🌍 Қазақстан — өңірлік және жаһандық ойыншы

Тоқаев Қазақстанның ұйымға мүше болғанына 33 жыл толғаннан бері БҰҰ-ның сенімді серіктесі болып келе жатқанын, сондай-ақ реформаларды, адами капиталды дамытуды, цифрландыруды, жасанды интеллект пен экологиялық стандарттарды ілгерілетіп отырғанын айтты.

Ол 2026 жылдың сәуірінде Астанада Өңірлік экологиялық саммиттің өтетінін жариялап, Ауғанстанның тұрақты дамуы аймақтық тұрақтылық үшін аса маңызды екенін атап өтті.

🕊️ Гутерриштің ризашылық сөзі

Антониу Гутерриш орталықтың ашылуын Орталық Азиядағы «ынтымақтастықтың жаңа дәуірінің бастауы» деп атап, Қазақстанның көшбасшылығына жоғары баға берді.

Оның айтуынша, Қазақстан шын мәнінде логистикалық және сауда хабына, «Шығыс пен Батысты жалғайтын көпірге», ядролық қарудан бас тартуымен бейбітшіліктің символына айналды.

«Қазақстанға шын жүректен тәнтімін. Бұл — ақыл-парасаттың үні, ал ондай дауыс әлемде күн өткен сайын азайып келеді»,

Орталықтың ашылуы, сонымен бірге, Түрікменстанда өтетін үшінші Дамушы, теңізге шыға алмайтын мемлекеттер жөніндегі БҰҰ конференциясына дайындық кезеңіне тұспа-тұс келді.