АҚШ НЛО туралы төрт топтама файлды құпиясыздандырды: бір оқиға Қазақстан аспанында болған

АҚШ 2026 жылғы мамырдан бері анықталмаған ұшатын нысандар туралы мемлекеттік файлдардың төрт топтамасын жариялады. PURSUE ресми мұрағатына құжаттар, фотосуреттер, аудиожазбалар мен әскери видеолар енгізілген, олардың арасында 1994 жылы Қазақстан аспанында болған жұмбақ оқиға да бар.

Құжатқа сәйкес, жолаушылар ұшағының экипажы өте жарық әрі жылдам нысанды шамамен 40 минут бақылаған. Ол шеңбер және шиыршық жасап ұшып, бірнеше рет 90 градусқа күрт бұрылған.

АҚШ әскери ведомствосы бұл материалдар бөгде ғаламшарлықтардың бар екенін дәлелдемейтінін ескертеді. Мұрағатқа табиғатын қолда бар деректер арқылы анықтау мүмкін болмаған оқиғалар енгізілген.

Қазақстан үстіндегі нысанды 40 минут бақылаған

Қазақстандық оқырман үшін ең қызықты құжаттардың бірі 1994 жылғы 31 қаңтарда АҚШ-тың Душанбедегі елшілігі жіберген дипломатиялық жеделхат болды. Ол АҚШ Мемлекеттік департаментіне, Орталық барлау басқармасына, әскери барлауға және Алматыдағы елшілікке жолданған.

Құпиясыздандырылған жеделхатта оқиғаның 1994 жылғы 27 қаңтарда болғаны жазылған. Tajik Air әуе компаниясының бас ұшқышы Эд Роудс пен екі америкалық пилот Boeing 747SP ұшағымен шамамен 12,5 шақырым биіктікте ұшып бара жатқан.

Ұшақ Қазақстан аумағындағы солтүстік ендіктің 45 және шығыс бойлықтың 55 градусы маңында болған. Экипаж шығыс көкжиектен өте үлкен жылдамдықпен жақындаған аса жарық нысанды байқаған.

Пилоттардың айтуынша, нысан олардың ұшағынан әлдеқайда биік ұшқан. Кейін ол бірқатар ерекше қозғалыс жасаған:

• экипаж нысанды шамамен 40 минут бақылаған;
• ол шеңбер және шиыршық түрінде қозғалған;
• жоғары жылдамдықпен 90 градусқа күрт бұрылған;
• соңында көлденең бағытта ұшып, көкжиектен жоғалған.

Оқиға қараңғы уақытта болғандықтан, ұшқыштар нысанның пішінін ажырата алмаған. Олар оның айналасындағы жарықты жоғары жылдамдықпен ұшып бара жатқан оқтың соққы толқынына ұқсатқан.

Күн шыққаннан кейін ұшақ нысан қалдырды деп болжанған іздердің астымен өткен. Эд Роудс іздердің шамамен 30 шақырым биіктікте болғанын айтқан. Олардың бағыты пилоттар сипаттаған шеңберлер мен шиыршықтарды қайталаған.

Экипаж бұл құбылыс метеор болуы мүмкін деген болжаммен келіспеген. Ұшқыштар бұған дейін атмосфераға кірген көптеген метеор мен ғарыш қалдығын көргенін, бірақ бұл нысанның қозғалысы оларға ұқсамағанын айтқан.

Роудс Olympus қалта камерасымен бірнеше сурет түсірген. Алайда жарияланған құжаттар арасында бұл фотосуреттер жоқ. Жеделхаттың соңында АҚШ елшілігі оқиғаға қатысты өз қорытындысын жасамағаны көрсетілген.

АҚШ НЛО файлдарын неге қазір жариялап жатыр

Жаңа жүйе Presidential Unsealing and Reporting System for UAP Encounters немесе қысқаша PURSUE деп аталады. Мұрағатқа Пентагон, ФБР, ЦРУ, NASA, Мемлекеттік департамент, Энергетика министрлігі және басқа америкалық мекемелердің материалдары жиналып жатыр.

Жоба АҚШ президенті Дональд Трамп мемлекеттік органдарға НЛО және анықталмаған аномальды құбылыстар туралы құжаттарды іздеп, тексеріп, жариялауды тапсырғаннан кейін басталған.

Америкалық ведомстволар ондаған миллион мұрағат жазбасын тексеруі керек. Олардың бір бөлігі әлі күнге дейін тек қағаз түрінде сақталған. Сондықтан жаңа файлдар табылған және құпиясыздандырылған сайын бірнеше апта аралығымен жарияланбақ.

Бірінші топтама: Ай үстіндегі үш жұмбақ нүкте

Бірінші топтама 8 мамырда жарияланды. Оған Қазақстандағы оқиғадан бөлек, Apollo 17 миссиясының фотосуреттері, ФБР құжаттары және әскери ұшқыштар түсірген видеолар кірген.

Ең көп назар аудартқан материалдардың бірі 1972 жылғы желтоқсанда Айда түсірілген сурет болды. Ай бетінің үстіндегі қара аспанда үш жарық нүкте үшбұрыш тәрізді орналасқан.

Сурет бұрыннан белгілі болғанымен, АҚШ мекемелері түпнұсқа пленканы қайта зерттеуге кіріскен. Алдын ала сипаттамада нүктелердің камера объективіне немесе пленкаға түскен нақты нысан болуы мүмкін екені айтылған.

Дегенмен бұл фотода ғарыш кемесі бейнеленгенін білдірмейді. Нүктелер пленканың ақауынан, оптикалық әсерден, шаңнан немесе басқа қарапайым себептерден пайда болуы мүмкін.

Осы топтамада Розуэлл оқиғасына қатысты ФБР материалдары да жарияланды. Құжаттардың бірінде табылған нысан әуе шарына ілінген құрылғы ретінде сипатталған. Бұл мәлімет Розуэллде бөтен ғаламшарлық кеме құлады деген танымал нұсқаны растамайды.

Екінші топтама: тікұшақ маңындағы қызғылт сары шарлар

Екінші топтама 22 мамырда шықты. Ондағы бір видео 2023 жылы Гурон көлінің үстінде америкалық жойғыш ұшақ атып түсірген нысанмен байланысты.

Кейін ол әуесқойлар ұшырған шағын аэростат болуы мүмкін деген болжам айтылды. Бірақ сынықтар табылмағандықтан, нысанның нақты не болғаны анықталмады.

Тағы бір видео 2022 жылы сүңгуір қайық маңында түсірілген. Мұрағаттың сипаттамасында бірнеше шар тәрізді нысан су бетіне жақын жерде пайда болып, кейін камераның көру аймағынан жоғалғаны жазылған.

Ең ерекше оқиғалардың бірін америкалық барлау қызметінің жоғары лауазымды өкілі баяндаған. Ол 2025 жылы жұмбақ жарықтарды тексеруге жіберілген әскери тікұшақта болған.

Офицердің сөзінше, экипаж таулардың үстінде әртүрлі бағытта қозғалған көптеген қызғылт сары шарды көрген. Кейін тікұшақтың жанына екі ірі сопақ жарық жақындап, айналмалы қалақтан сәл жоғары деңгейде біраз уақыт қозғалмай тұрған.

Алайда жарияланған деректер нысандардың көлемін, қашықтығын және нақты жылдамдығын анықтауға жеткіліксіз.

Осы топтамаға ғарышкерлердің кеменің жанындағы «от ұшқындары» мен «қар ұлпалары» туралы әңгімелері де кірді. NASA бұл құбылысты түсіндіре алған: ғарышкерлер Күн сәулесін шағылыстырған мұздаған конденсат бөлшектерін көрген.

Үшінші топтама: шар тоған үстінде 45 минут тұрған

Үшінші топтама 12 маусымда жарияланды. Оның ең танымал материалдарының бірі Orbs Over the Pond деп аталатын видео болды.

Жазба 2024 жылғы қазанда АҚШ-тың солтүстік-шығысында түсірілген. Куәгер жарқыраған нысанның тоған үстінде шамамен 45 минут тұрғанын мәлімдеген.

ФБР сипаттамасында нысан жарқыраған плазмалық шарға ұқсатылған. Ол жарықтығы мен пішінін өзгертіп, кей сәттерде бірнеше ұсақ нүктеге бөлінгендей көрінген.

Басқа құжаттарда 2023 жылы АҚШ-тың батысында бес федералдық агент байқаған қызыл жарықтар сипатталады. Олардың айтуынша, жарықтар бір бағытта қатарласа қозғалған, ал ірі қызғылт сары нысанның жанында шағын жарқыраған шарлар пайда болған.

ФБР куәгерлердің сөздері бойынша цифрлық реконструкциялар жасаған. Олар нақты фотосурет емес, адамдардың есте сақтаған көрінісін бейнелейді.

Төртінші топтама: ядролық зауыт үстіндегі нысан

Ең жаңа төртінші топтама 10 шілдеде жарияланды. Онда ядролық қару құрастырылатын және техникалық қызмет көрсетілетін Техастағы Pantex зауытына қатысты оқиға бар.

2015 жылғы қыркүйекте күзет қызметкерлері зауыттың әуе кеңістігінде белгісіз нысанды байқаған. Ол баяу қозғалып, ешқандай дыбыс шығармаған.

Екі қызметкер нысанға автокөлікпен жақындауға тырысқанымен, оны қуып жете алмаған. Күзетшілер дүрбі арқылы қанат, бұранда немесе қозғалтқыш белгісін көрмеген. Зауыт уақытша жабық қауіпсіздік режиміне көшірілген.

Топтамаға 2025 жылы Сары теңіз үстінде түсірілген сенсорлық видео да кірген. Экрандағы контрастты дақ алты бұрышты жұлдызға ұқсайды. Тағы бір нысан Шығыс Қытай теңізінің үстінде бірнеше минут бақыланған.

Тарихи материалдар арасында 1949 жылы Лос-Аламос ғалымдары өткізген жиынның хаттамасы бар. Ғалымдар ядролық зертхана маңында бірнеше рет көрінген жасыл отты шарларды талқылаған.

Олар метеор болуы мүмкін деген нұсқаны қарастырғанымен, құбылыстың сыртқы көрінісі мен қозғалысы қалыпты метеорларға ұқсамағанын атап өткен. Нақты түсініктеме сол кезде табылмаған.

НЛО деген міндетті түрде ғарыш кемесі емес

Қазіргі ресми құжаттарда UAP, яғни анықталмаған аномальды құбылыс термині қолданылады. Бұл атау фото, видео, куәгер сөзі немесе сенсор деректері арқылы бірден анықтау мүмкін болмаған кез келген нысанға берілуі мүмкін.

«Шешілмеген оқиға» мәртебесі көбіне ақпараттың жеткіліксіздігін білдіреді. Көптеген видеода нысанға дейінгі қашықтық, оның көлемі, жылдамдығы, ауа райы және камераның техникалық ерекшеліктері туралы толық мәлімет жоқ.

AARO тарихи есебінде америкалық зерттеулердің бөгде ғаламшарлық технологияға қатысты дәлел таппағаны жазылған. Ведомство құлаған ғарыш кемелерін жасырын зерттеу немесе олардың технологиясын көшіру бағдарламасы болғанын да растамады.

2024 жылғы жылдық есепте 757 хабарлама қарастырылған. Кейбір оқиғалар әуе шарлары, құстар, дрондар, ұшақтар немесе жерсеріктер ретінде түсіндірілген. Жүздеген басқа жағдай бойынша нақты қорытынды жасауға дерек жетпеген.

PURSUE мұрағаты әлі толық емес. АҚШ мекемелері жаңа файлдарды тауып, құпиясыздандырған сайын келесі топтамаларды жариялауды жоспарлап отыр.