Қазақстан шекарасында қосымша багы бар 255 көлік анықталды

Қазақстанда жанар-жағармайды шекара арқылы заңсыз әкетуге қарсы бақылау күшейтілді. 2026 жылдың басынан бері қосымша жанармай багы заңсыз орнатылған көліктерді пайдаланудың 255 дерегі анықталды, деп хабарлады Ішкі істер министрлігі.

Мемлекеттік шекарадағы автомобиль өткізу бекеттерінің маңында 59 полиция бекеті жұмыс істеп тұр. Полиция қызметкерлері басқа мемлекеттік органдармен бірге елден шығатын көліктерді тексеріп, жанармай тасуға арналған заңсыз жабдықтарды анықтайды.

195 шетелдік жауапқа тартылды

Тексеру нәтижесінде 195 шетел азаматы және 60 Қазақстан азаматы әкімшілік жауапқа тартылған. Оларға Әкімшілік құқық бұзушылық туралы кодекстің 590-бабының 7-бөлігі бойынша хаттама толтырылды.

Бұл бап көлік құралын пайдалану талаптарын бұзғаны үшін жауапкершілікті қарастырады. Заңсыз орнатылған қосымша бактар алынып тасталғаннан кейін көліктер иелеріне қайтарылған.

Қосымша бактар жанармай тасуға пайдаланылған

Құқық қорғау органдары сыйымдылығы әдеттегіден үлкен немесе көлік конструкциясына рұқсатсыз енгізілген жанармай бактарына ерекше назар аударып отыр. Мұндай жабдық көліктің өз қажетіне қарағанда әлдеқайда көп жанармай құйып, оны шекарадан өткізуге мүмкіндік береді.

ІІМ жүргізушілер мен тасымалдаушыларды көлік құралдарын өз бетінше өзгертпеуге және заң талаптарын сақтауға шақырды. Ведомство жанар-жағармайды елден заңсыз әкету әрекеттері анықталып, тоқтатылатынын ескертті.