Аудио мен видео қашан дәлел бола алады? Конституциялық сот түсіндірді

Қазақстанның Конституциялық соты қылмыстық істерде аудио және бейнежазбаларды дәлел ретінде пайдалану талаптарын түсіндірді. Соттың хабарлауынша, дәлелдеме ретінде тек заңды жолмен алынған мәліметтер танылады. Сондықтан әр істе жазбаның қалай алынғанын тексеру қажет.

Түсіндірмеге аудио және бейнежазбаларды дәлелдеме ретінде қолдануға қатысты өтініш негіз болған. Өтініште Жоғарғы соттың нормативтік қаулысындағы ереже дауланған.

Конституциялық сот аталған ереже жазбаларды алу тәртібін белгілемейтінін атап өтті. Сондай-ақ ол сотты ұсынылған материалдың іске қатысы бар-жоғын және оны дәлелдеме ретінде пайдалануға жол берілетінін тексеру міндетінен босатпайды.

Яғни аудио немесе бейнежазбаның болуы оны автоматты түрде дәлелдемеге айналдырмайды. Сот оның мазмұнымен қатар, қандай жолмен алынғанын да бағалауға тиіс.

Конституциялық соттың түсіндірмесі бойынша, жазбаның заңдылығы әрбір қылмыстық істе жеке тексерілуі керек.