Аргентина мен Мысыр матчы WhatsApp тарихындағы рекордты жаңартты

2026 жылғы футболдан әлем чемпионатындағы Аргентина мен Мысыр матчы кезінде WhatsApp қолданушылары секундына 29 миллионнан астам хабарлама жіберді. Бұл мессенджер тарихындағы ең жоғары көрсеткіш болды, деп хабарлады Meta компаниясы.

Рекорд 7 шілдеде Атлантада өткен әлем чемпионатының 1/8 финалында тіркелді. Аргентина екі гол айырмасымен жеңіліп жатып, есепті өзгертіп, Мысырды 3:2 есебімен жеңді.

Ойынның нәтижесі соңғы минуттарға дейін белгісіз болды. Жанкүйерлер матчты бір мезетте талқылап, голдар, төрешілер шешімі және Аргентинаның камбэгі туралы хабарламалармен бөліскен.

Бұған дейінгі рекорд 2022 жылғы финалда орнаған

Meta нақты қай минутта ең жоғары жүктеме тіркелгенін жарияламады. Компания тек Аргентина мен Мысыр кездесуі кезінде WhatsApp секундына 29 миллионнан астам хабарлама өңдегенін хабарлады.

Алдыңғы рекорд 2022 жылғы әлем чемпионатының финалында тіркелген еді. Ол кезде Аргентина мен Франция негізгі және қосымша уақытта 3:3 есебімен тең ойнап, жеңімпаз пенальти сериясында анықталған.

Осылайша Аргентина құрамасы қатысқан матч WhatsApp-та екінші әлем чемпионаты қатарынан рекорд орнатып отыр.

Футболшыларға 213 миллионнан астам адам жазылды

Әлем чемпионаты Instagram-дағы футболшылар аудиториясына да айтарлықтай әсер еткен. 11 маусым мен 11 шілде аралығында турнирге қатысқан ойыншыларға жалпы 213,6 миллион жаңа адам жазылған.

Олардың жиынтық аудиториясы бір айда 3,26 миллиардтан 3,47 миллиард жазылушыға дейін өсті. Өсім 6,6 пайызды құрады.

Ең күтпеген нәтиже Кабо-Верде құрамасының қақпашысы Вожиньядан байқалды. Meta мәліметінше, турнир басталғанға дейін оның 37 мың жазылушысы болған. Кейін бұл көрсеткіш 28,8 миллионға дейін жеткен.

Норвегиялық Эрлинг Холанд 23 миллион жаңа жазылушы жинады. Криштиану Роналдуға тағы 10 миллион адам жазылып, оның жалпы аудиториясы 676 миллионға жеткен.

Лионель Мессидің парақшасына 5,6 миллион жаңа қолданушы қосылды. Аргентина құрамасы ойыншыларының жалпы аудиториясы 18,4 миллион адамға өскен.

Әлем чемпионаты басқа платформаларға да әсер етті

Threads желісінде әлем чемпионатына арналған белгісі бар жазбалар 1,5 миллиард көрсетілім жинады. Футболға арналған қауымдастықтың контентін күніне орта есеппен 15 миллионға жуық адам көрген.

Facebook қолданушылары турнир басталғалы әлем чемпионаты туралы 80 миллион жазба жариялаған.

Бұл көрсеткіштер ірі спорттық оқиғалар кезінде адамдардың матчты тек теледидардан көріп қана қоймай, оны мессенджерлер мен әлеуметтік желілерде бір уақытта талқылайтынын көрсетеді.