Трамп жүкті әйелдерді парацетамолдан бас тартуға шақырды — аутизм себептері ме?

АҚШ президенті Дональд Трамп Тайленол препаратының басты заты — парацетамолға қатысты резонансты мәлімдеме жасады. Оның айтуынша, жүктілік кезінде бұл дәріні қабылдау баланың аутизмге шалдығуына себеп болуы мүмкін.

«Тайленолды қолдану дұрыс емес. Дәрігерлер жүкті әйелдерге оны тек жоғары температура болған жағдайда ғана шектеулі қолдануға кеңес береді»

Дәрігерлер мен фармацевтикалық компанияның жауабы

Халықаралық сарапшылар мен препараттың өндірушісі Kenvue компаниясы президенттің мәлімдемесін жоққа шығарды. Компания «күшті ғылыми дәлелдер парацетамол (ацетаминофен) қабылдаудың аутизмге себеп болмайтынын анық көрсетеді» деп мәлімдеді.

Ресейлік мамандардың, соның ішінде акушер-гинеколог Сергей Канюковтың айтуынша, парацетамол жүкті әйелдерге температураны түсіретін және ауырсынуды басатын жалғыз қауіпсіз дәрі. «Оның аутизммен байланысы туралы ешқандай дәлел жоқ», — дейді маман.

Зерттеулер не дейді?

Кейбір ғылыми жұмыстарда парацетамолды жүктілік кезінде қабылдау мен аутизм спектріндегі ауытқулар арасында әлсіз байланыс бар екені айтылған. Дегенмен, бұл деректер бірізді емес және себеп-салдарлық байланысты растамайды.

«Парацетамолды әлем бойынша жүкті әйелдерге қолдануға тыйым салынбаған. Ол температураны түсіру және ауырсынуды басу үшін ең қауіпсіз дәрі саналады»,

Трамптың даулы уәждері

Америка басшысы сондай-ақ Кубаны мысалға келтіріп, «ондағы халықтың дәріге ақшасы жоқ болғандықтан, балаларда аутизм жоқ» деп мәлімдеді. Ол әйелдерді «шыдау» мен дәріні ерекше ауыр жағдайларда ғана қолдануға шақырды.

Алайда дәрігерлер ескертеді: парацетамолдан бас тарту оны қабылдағаннан да қауіпті болуы мүмкін. Жүктілік кезінде дене қызуының көтерілуі болашақ балаға едәуір зиян келтіруі ықтимал. Сондықтан мамандар медициналық кеңестерге құлақ асуға шақырады.

Осылайша, Трамптың мәлімдемесі дәрі-дәрмектің қауіпсіздігі жөнінде жаңа пікірталас туғызды. Оның қарамастан, әлемдік медициналық қауымдастық парацетамолдың жүкті әйелдерге қауіпсіз екенін алға тартады.