Бойдақ ер адамдар төсек жаймасын жылына төрт рет қана ауыстыра ма

Әлеуметтік желіде бойдақ ер адам төсек жаймасын орта есеппен жылына төрт рет қана ауыстырады деген мәлімет тарады. Алайда бұл бүкіл әлемге қатысты жаңа статистика емес, 2013 жылы Ұлыбританияда жүргізілген коммерциялық сауалнаманың нәтижесі.

Бұл тұжырымды World of Statistics аккаунты X желісінде жариялады. Жазба көп талқыланғанымен, онда зерттеудің өткізілген жылы, елі және қатысушылар саны көрсетілмеген.

Жылына төрт рет деген сан қайдан шыққан

Мәліметті 2013 жылы британдық Ergoflex матрас компаниясы жүргізген сауалнамаға дейін бақылауға болады. Оған 18 бен 55 жас аралығындағы 2004 адам қатысқан.

Сауалнама бойынша бойдақ ер адамдар төсек жаймасын орта есеппен үш айда бір рет ауыстырған. Бұл жылына шамамен төрт рет деген сөз.

Сол кездегі жарияланымдарда бойдақ ерлердің 49 пайызы жайманы жылына төрт рет жууды қалыпты деп санағаны айтылды. Жас қатысушылар арасында төсек-орынды үш ай немесе одан да ұзақ уақыт ауыстырмайтындар жиірек кездескен.

Бойдақ әйелдер жайманы орта есеппен екі жарым апта сайын, ал бірге тұратын жұптар екі апта сайын ауыстырған.

Жаңа сауалнама да осы мәселеге назар аударған

2022 жылы Ұлыбританиядағы 2250 ересек адам қатысқан тағы бір сауалнама жүргізілді. Оның нәтижесінде бойдақ ерлердің 45 пайызы төсек жаймасын үш немесе төрт айда бір рет жуатынын айтқан.

Қатысушылардың 12 пайызы жайманы нақты кесте бойынша емес, есіне түскен кезде ғана жуатынын мойындаған. Негізгі себептер ретінде ұмытып кету, жиі жуудың қажеті жоқ деп ойлау және таза қосалқы жайманың болмауы аталған.

Дегенмен екі сауалнама да ғылыми медициналық зерттеу емес. Олар адамдардың өз жауаптарына негізделген және тек Ұлыбритания тұрғындарының белгілі бір тобын қамтыған. Сондықтан «барлық бойдақ ер адам осылай істейді» деген қорытынды жасауға болмайды.

Төсек жаймасын қаншалықты жиі жуу керек

Мамандардың кеңесі сауалнамадағы нәтижеден әлдеқайда жиі. Cleveland Clinic мамандары жайманы кемінде бір немесе екі апта сайын ауыстыруды ұсынады.

Төсек жаймасын аптасына бір рет жуған дұрыс, егер адам:

• түнде көп терлейтін болса;
• аллергия немесе демікпемен ауыратын болса;
• үй жануарын төсегіне жатқызса;
• ұйықтар алдында душ қабылдамаса;
• төсекте тамақ ішсе;
• жақында ауырып шықса.

Жастық тысын да аптасына кемінде бір рет ауыстырған дұрыс. Ол адамның бетімен және шашымен тікелей жанасатындықтан, тері майы, косметика қалдығы мен тер тезірек жиналады.

Жуылмаған жаймада не жиналады

Адам ұйықтап жатқанда жаймаға тер, тері майы, шаш, сілекей және өлі тері жасушалары түседі. Уақыт өте келе төсек-орында шаң, тозаң, бактериялар және шаң кенелерінің қалдықтары жиналуы мүмкін.

Бұл міндетті түрде адам бірден ауырып қалады дегенді білдірмейді. Бірақ лас жайма жағымсыз иіс шығарып, сезімтал теріні тітіркендіруі, безеуді күшейтуі немесе аллергия белгілерін асқындыруы ықтимал.

Жайманы жуар алдында матаның затбелгісіндегі нұсқаулықты тексерген жөн. Мақта мата жоғарырақ температураға төзімді болуы мүмкін, ал жібек, бамбук немесе нәзік маталарға салқын су мен жұмсақ жуу режимі қажет.

Сондықтан жылына төрт рет деген мәліметті қазіргі орташа көрсеткіш ретінде қабылдауға болмайды. Бұл 2013 жылғы британдық сауалнамадан қалған есте қаларлық сан, ал тазалық үшін төсек жаймасын шамамен аптасына бір рет немесе кемінде екі аптада бір рет ауыстырған дұрыс.