Қазақстанда ЭЦҚ-ны онлайн алу жолы. Жаңа рәсімдеу тәртібі

2025 жылдың 11 тамызынан бастап Қазақстанда электрондық цифрлық қолтаңба (ЭЦҚ) алу тәртібі түбегейлі өзгереді. Енді ЭЦҚ-ны тек онлайн түрде, Халыққа қызмет көрсету орталығына бармай-ақ рәсімдеуге болады. Бұл туралы Цифрлық даму, инновациялар және аэроғарыш өнеркәсібі министрлігі хабарлады.

ЭЦҚ қалай алуға болады

ЭЦҚ рәсімдеу ресми egov.kz және pki.gov.kz порталдарында қолжетімді. Ол үшін:

1. Онлайн өтінімді толтыру қажет;
2. Бет-әлпет арқылы биометриялық сәйкестендіруден өту керек.

Жеке тұлға расталған соң, кілт бірден беріледі. Егер сәйкестендіру сәтсіз өтсе (мысалы, дерекқорда фотосурет болмаса), пайдаланушыға биометриядан өту үшін төрт мүмкіндік беріледі. Тек содан кейін ғана ЭЦҚ-ны ХҚКО арқылы рәсімдеуге рұқсат етіледі.

Интернеті жоқтар не істейді

Интернетке қолжетімі жоқ азаматтар Халыққа қызмет көрсету орталықтарындағы өз-өзіне қызмет көрсету аймақтарын пайдалана алады. Мұнда да биометриялық сәйкестендіру жүргізіледі және сәтті өткен жағдайда ЭЦҚ онлайн беріледі — қызметкерлердің қатысуынсыз.

Онлайн форматқа неге көшуде

2025 жылдың басынан бері Қазақстанда 14,9 миллионнан астам ЭЦҚ кілті берілді, оның 92 пайыздан астамы қашықтан рәсімделген. Бұл жүйенің және халықтың онлайн форматқа толық көшуге дайын екенін көрсетеді.