Яндекс таксиге Қазақстанда нақты бәсекелес пайда болады

Қазақстанда жақын арада тағы бір ірі такси сервисі — Bolt іске қосылады. Ол қазір жұмыс істеп жатқан Yandex Go мен InDrive сияқты ойыншыларға бәсекелес болмақ. Бұл туралы көлік министрі Нұрлан Сауранбаев Үкіметтегі брифингте мәлімдеді.

«Такси бағаларын реттеу үшін нарыққа қосымша компанияларды енгізу керек, сонда халықтың таңдау мүмкіндігі артады. Біз осы бағытта белсенді жұмыс істеп жатырмыз. Қазір балтықтық Bolt компаниясы нарыққа кіре бастады. Алдымен олар самокат сервистерін іске қосады, кейін толыққанды такси қызметіне көшеді», — деп атап өтті министр.

Ведомство басшысының айтуынша, нарықтағы бәсеке біртіндеп артып келеді. Мысалы, InDrive компаниясы Яндекс позицияларына қысым жасап жатыр. Яндекс әлі де қамтуы мен технологиялық шешімдері жағынан көшбасшылар қатарында, бірақ баға қолжетімділігі бойынша олай емес.

«Мен жуырда өзім такси қызметін пайдаландым. Әрине, баға қымбат екен. Бірақ біз тарифтерді реттемейміз — бұл біздің құзыретімізге кірмейді»,

Bolt cервисі туралы не белгілі

• Bolt — 2013 жылы Таллинде негізі қаланған, бұрынғы атауы Taxify болған эстондық технологиялық компания.
• Бүгінде Bolt 45-тен астам елде және 500-ден аса қалада, негізінен Еуропа, Африка мен Азияда жұмыс істейді.
• Таксиден бөлек, компания электросамокаттарды жалға беру, тамақ жеткізу (Bolt Food), сондай-ақ азық-түлік пен курьерлік қызметтерді дамытып келеді.
• Bolt экологиялық көлік пен тұрақты мобильділікке белсенді инвестиция салады. Компания Bolt-тың барлық еуропалық сапарлары 2021 жылдан бері «көміртек бейтарап» деп мәлімдейді.
• Bolt-тың жұмыс үлгісі жүргізушілер үшін комиссияның төмен болуы арқылы бәсекелестеріне қарағанда тартымды келеді.

Бұл жолаушылар үшін нені білдіреді?

Bolt-тың Қазақстан нарығына шығуы қосымша бәсеке туғызып, бағалардың төмендеуіне, қызмет сапасының артуына және пайдаланушылар үшін таңдаудың кеңеюіне ықпал етуі мүмкін. Әсіресе, қазіргі көшбасшыларда тарифтер қымбаттап жатқан тұста бұл мәселе аса өзекті.

Алдымен компания самокат сервисін іске қосады, кейін такси қызметіне көшеді. Толыққанды іске қосылудың нақты мерзімі әзірге белгісіз.

Айта кетейік, 2021 жылдың мамырында қытайлық DiDi сервисі Қазақстан нарығына шықты, алайда 2022 жылдың наурызында елдегі және Ресейдегі жұмысын тоқтататынын хабарлады. Бұған «нарық жағдайының өзгеруі мен өзге де қиындықтар» себеп болған. Компания күткен нәтижеге жете алмағанын мойындады. Bolt-тың қолынан Didi-ге орындалмаған нәтижеге жету келе ме, ол жағын уақыт көрсетеді.