Қазақстанда техникалық қарасораны өсіруге болады

Қазақстан Үкіметі өнеркәсіптік мақсатта өсіруге рұқсат етілген техникалық қарасора сорттарының тізімін бекітті. Қаулы 2025 жылғы 24 қыркүйектен бастап күшіне енді.

Өнеркәсіп үшін 218 қарасора сорты

Бекітілген тізімге әлемнің әр елінен алынған 218 қарасора сорты енгізілді. Бұл қатарда АҚШ, Аустралия, Германия, Қытай, Ресей, Украина, Жапония, Италия, Канада, Франция, Польша және басқа да елдердің сорттары бар.

Мысалы, АҚШ-тан Бялобжеске, Карманьола Селект, Унико Б, Тиборсаллаша, Аустралиядан – Банди Джем, Хан ФНКью, Морпет сорттары енген. Сондай-ақ, Қытайдан (Юнма, Лунма), Ресейден (Гляна, Виктория, Омегадар) және Украинадан (USO-31, Артемида, Зоряна) алынған түрлер бар.

Қарасора қайда өсіріледі?

Ауыл шаруашылығы вице-министрі Азат Сұлтановтың айтуынша, әзірге өнеркәсіптік өндіріс басталмағанымен, инвесторлар Солтүстік Қазақстан облысында, әсіресе Уәлиханов ауданында алаңдар қарастыруда.

Техникалық қарасорадан май мен қағаздан бастап, жоғары қауіпсіздік деңгейі бар арнайы құжаттар – жеке куәліктер, паспорттар мен құнды қағаздарға дейін алуан түрлі өнім шығарылмақ. Өндірілген өнімнің басым бөлігі экспортқа бағытталады деп күтілуде.

Мемлекеттік қатаң бақылау

«Техникалық қарасорада ТГК мөлшері өте төмен немесе мүлде жоқ. Зертханалық талдаулар тұрақты түрде өткізіледі. Тыйым салынған деңгей анықталса, егін түгелдей жойылады. Бақылау төрт мәрте — ІІМ мен сот сараптамасы тарапынан жүргізіледі»,

Ауыл шаруашылығы министрі Айдарбек Сапаров ІІМ қазіргі таңда төрт лицензия алғанын, ал бір компания қызығушылық танытқанын нақтылады. Егіс алқаптары қоршалып, тұрақты күзетте болады.

Қазақстанға бұл не үшін қажет?

Техникалық қарасора есірткілік сорттардан ерекшеленеді: ол биік болып келеді, сабағы жұқа әрі жапырақтары ұзын. Оның құндылығы — берік талшықтары мен экологиялық әрі қорғалған материалдар жасау мүмкіндігінде.

Осылайша, Қазақстан өнеркәсіптік қарасораны экспорт пен қағаз және тоқыма өнеркәсібіндегі импорт алмастыру құралына айналдыруды көздеп отыр.