Алматы жастары өз жобасына 5 млн теңгеге дейін ала алады

Алматыда тұратын 18-35 жас аралығындағы Қазақстан азаматтары өз жобасын жүзеге асыруға 500 мыңнан 5 млн теңгеге дейін қаржы ала алады. «Жастардың қатысу бюджеті» бағдарламасына өтінім 2026 жылғы 2 тамызға дейін JasAlmaty платформасында қабылданады.

Бағдарлама жастарға қаладағы нақты мәселені шешетін бастамаларды өздері ұсынып, іске асыруға мүмкіндік береді. Жобалардың жалпы бюджеті 90 млн теңгені құрайды.

Кімдер өтінім бере алады

Байқауға Алматыда тұратын 18-35 жас аралығындағы Қазақстан азаматтары қатыса алады. Өтінімді жеке адам да, бастамашыл топ та бере алады.

Сонымен қатар жастар ұйымдары мен қоғамдық бірлестіктердің жобалары қабылданады. Бір бастамаға бөлінетін қаржы оның ауқымы мен сметасына байланысты болады:

• ең төменгі сома: 500 мың теңге;
• ең жоғары сома: 5 млн теңге;
• жобаны жүзеге асыру мерзімі: бір айдан үш айға дейін.

Ұйымдастырушылар 12-ден 60-қа дейін жастар бастамасын қолдауды жоспарлап отыр.

Қандай жобалар қабылданады

Бастама Алматы тұрғындарына пайдалы болып, нақты нәтижеге жеткізуі керек. Байқауға мына бағыттар бойынша жобалар ұсынуға болады:

• қоғамдық кеңістіктерді абаттандыру және қалалық ортаны дамыту;
• экология, қалдықтарды азайту және таза энергия;
• спорт және салауатты өмір салты;
• білім беру және пайдалы дағдыларды дамыту;
• цифрлық технологиялар және жасанды интеллект;
• жастар кәсіпкерлігі мен туризм;
• мәдениет, өнер, сән және дизайн;
• медиа және ақпараттық жобалар;
• инклюзия және әлеуметтік бейімдеу;
• психологиялық және репродуктивті денсаулық.

Жобаның мақсаты түсінікті, бюджеті негізді және белгіленген мерзімде орындалатындай болуы қажет.

Өтінімді қалай тапсырады

Құжаттар тек электронды түрде қабылданады. Өтінімді электрондық пошта, мессенджер немесе қағаз түрінде жіберуге болмайды.

1. JasAlmaty платформасында тіркелу;
2. электронды өтінімді толтыру;
3. жоба шешетін мәселені, мақсатты аудиторияны және күтілетін нәтижені көрсету;
4. толық смета мен күнтізбелік жоспар дайындау;
5. жоба презентациясын және қажетті құжаттарды тіркеу;
6. өтінімді 2 тамызға дейін жіберу.

Қатысушыдан жеке куәліктің көшірмесі, жеке деректерді өңдеуге келісім, команда туралы мәлімет, жоба сметасы мен презентациясы сұралады. Қажет болған жағдайда бизнес-жоспар, портфолио немесе қолдау хаттарын қосуға болады.

Жеңімпаздар онлайн дауыс берумен анықталады

3-6 тамыз аралығында өтінімдер техникалық және сараптамалық тексеруден өтеді. Комиссия жобаның өзектілігін, қалаға пайдасын, бюджетінің негізділігін және белгіленген уақытта іске асу мүмкіндігін бағалайды.

Іріктеуден өткен бастамалар 7-16 тамыз аралығында ашық онлайн дауыс беруге шығарылады. Қазақстан тұрғындары ЭЦҚ немесе SMS-код арқылы жеке басын растағаннан кейін үш жобаға дейін қолдау көрсете алады.

Жеңіске жеткен жобалар 17 тамыз бен 15 қараша аралығында жүзеге асырылуы тиіс.

Қаражат екі кезеңмен беріледі

Бағдарлама ережесіне сәйкес, жеңімпазға алдымен жоба бюджетінің 50 пайызы беріледі. Қалған бөлігі жоба толық аяқталып, қорытынды есеп тапсырылғаннан және алғашқы қаражаттың мақсатты жұмсалғаны расталғаннан кейін төленеді.

Жеңімпаздар шығындарды чек, акт, фото және басқа құжаттармен растауы керек. Қаражатты өтінімде көрсетілмеген мақсаттарға жұмсауға болмайды.