Астанада туған күнге салют атқан екі тұрғын бес тәулікке қамалды

Астанада достарын туған күнімен құттықтау үшін тұрғын үйлердің ауласында түнде салют атқан екі ер адам бес тәулікке әкімшілік қамауға алынды. Олардың әрекеті ұсақ бұзақылық деп бағаланды. Бұл туралы Polisia.kz хабарлады.

Алғашқы жағдай Сарыарқа ауданында болған. Полиция мәліметінше, 18 жастағы жігіт досын туған күнімен құттықтамақ болып, Ықылас Дүкенұлы көшесіндегі тұрғын үйлердің бірінің ауласында түнгі уақытта салют атқан.

Пиротехниканың қатты дауысы тұрғындардың тыныштығын бұзып, полицияға шағым түскен. Тәртіп сақшылары салют атқан азаматты анықтады.

Осыған ұқсас екінші жағдай Есіл ауданында тіркелген. 24 жастағы ер адам Әл-Фараби даңғылы маңындағы тұрғын үйдің ауласында досының туған күніне орай салют атқан.

Екеуі де бес тәулікке қамалды

Полиция екі жағдайды да ұсақ бұзақылық ретінде қарастырған. Материалдар сотқа жіберіліп, нәтижесінде екі азаматтың әрқайсысына бес тәулік әкімшілік қамау жазасы тағайындалды.

Тұрғын үйлердің ауласында түнгі уақытта пиротехникалық бұйымдарды пайдалану көптеген азаматтың мүддесіне әсер ететінін түсіну керек. Полиция мұндай жағдайларға әрекет етіп, құқық бұзушыларды анықтайды және заңда көзделген шараларды қабылдайды.

Полиция жеке мереке немесе туған күн қоғамдық тәртіпті сақтау міндетінен босатпайтынын еске салды. Тұрғын үйлердің ауласында түнгі уақытта пиротехника пайдалану заңда көзделген жауапкершілікке әкелуі мүмкін.

Астанада түнгі шуға қатысты шағым көп

Бұған дейін жарияланған полиция деректеріне сәйкес, 2026 жылдың басынан бері Астанада 102 арнасына тыныштықты бұзу бойынша 25 мыңнан астам хабарлама түскен. Олардың 83%-дан астамы сағат 22:00 мен 02:00 аралығына тиесілі.

Шағымдардың шамамен үштен екісі аула мен көшедегі шуға байланысты болған. Бұған қатты сөйлейтін компаниялар, айқай, түнгі уақытта ойын алаңдарындағы шу және пиротехниканы пайдалану жатады. Салют пен басқа да пиротехникалық бұйымдарға қатысты 110-нан астам өтініш тіркелген.

Елордада салют үшін әкімшілік қамауға алу жағдайлары бұған дейін де болған. Тамызда тұрғын үйлерге жақын орналасқан мейрамхана маңында салют атқан ер адам бес тәулікке қамалған. Тағы бір тұрғын қарындасын туған күнімен құттықтау үшін отшашу ұйымдастырып, дәл осындай жаза алған.