Көк-Төбедегі 25 мың теңгелік тариф жұртты таңғалдырды

Алматыдағы Көк-Төбе паркінің аумағына жеке көлікпен кіру құны әлеуметтік желіде қызу талқыланып жатыр. Бұған көлікпен кіру және тұрақ үшін 25 мың теңге көрсетілген бейне себеп болды.

Желі қолданушылары бұл соманы тым жоғары деп бағалап, тарифтің неге мұндай екеніне қатысты түрлі пікір жазды. Кейін бұл баға Көк-Төбенің ресми сайтындағы автокөлік иелеріне арналған бөлімде де көрсетілгені белгілі болды.

Ресми мәліметке сәйкес, жеңіл автомобильмен тікелей парк аумағына кіру құны — 25 000 теңге. Бұл сома дәл жоғарғы аумаққа көлікпен кіруге қатысты.

Сонымен қатар келушілер үшін арзанырақ нұсқалар да бар. Мысалы, Омарова көшесі, 41 мекенжайындағы аялдама кешені аумағына кіру жеңіл автомобиль үшін 700 теңге деп көрсетілген. Ал Достық даңғылы, 104Б мекенжайындағы төменгі станция аумағында алғашқы сағат 400 теңге, одан кейін әр сағат 100 теңге тұрады.

Көлік түріне қарай тариф те өзгереді

Көк-Төбе сайтындағы ақпарат бойынша, парк аумағына мотоцикл немесе мопедпен кіру — 2 000 теңге. Лимузин үшін тариф 30 000 теңге, 8-15 орындық микроавтобус үшін 40 000 теңге, ал 15-50 орындық микроавтобус үшін 50 000 теңге деп көрсетілген.

Парк бұл тарифті қалай түсіндірген

Бұған дейін парк өкілдері жоғары тариф жеке көліктер санын азайту, табиғи аумаққа түсетін жүктемені төмендету және қоғамдық тәртіпті сақтау мақсатында енгізілгенін түсіндірген. Сондай-ақ көліктен шығатын шу мен түтінді азайту, жасыл желекті сақтау және жаяу жүргіншілерге ыңғайлы орта қалыптастыру мәселелері айтылған.

Парк өкілдерінің түсіндіруінше, тарифтен түскен қаражат аумақты санитарлық ұстауға, қоқыс шығаруға, күзет пен тәртіпті қамтамасыз етуге, жасыл желекті күтіп-баптауға және туристік инфрақұрылымды дамытуға жұмсалады.

Көк-Төбеге көліксіз қалай баруға болады

Көк-Төбеге барудың басқа жолдары да бар. Ресми прайс-лист бойынша, канат жолымен бір бағытқа ересек адамға билет 6 000 теңге, екі бағытқа 10 000 теңге тұрады. 6 жастан 12 жасқа дейінгі балалар үшін бір бағыт — 3 000 теңге, екі бағыт — 5 000 теңге.

Омарова көшесінен жүретін жолаушылар автобусы ересектер үшін бір бағытқа 2 000 теңге, екі бағытқа 3 000 теңге. Достық даңғылынан автобуспен бару бір бағытқа 3 000 теңге, екі бағытқа 4 000 теңге деп көрсетілген.

Бұл неге маңызды

Көк-Төбе — Алматыдағы ең танымал туристік орындардың бірі. Сондықтан мұндағы көлік қозғалысы, тұрақ бағасы және келушілер ағыны қала тұрғындары үшін де, туристер үшін де маңызды мәселе болып отыр.

25 мың теңгелік тариф бәріне бірдей міндетті емес: ол парк аумағына жеке көлікпен тікелей кіруге қатысты. Ал келушілер арзанырақ тұрақ орындарын, автобус пен канат жолын таңдай алады.