Қазақстанда жол ережесін жиі бұзған жүргізушілер куәлігінен бір жылға айырылуы мүмкін

Қазақстанда жол қозғалысы ережесін жүйелі түрде бұзатын жүргізушілер үшін балдық жүйе енгізілуі мүмкін. Бірнеше рет немесе ауыр құқық бұзушылық жасаған жағдайда айыппұлмен қатар жүргізуші куәлігінің қолданысын бір жылға тоқтату қарастырылып жатыр. Бұл туралы Үкімет отырысында ішкі істер министрі Ержан Саденов мәлімдеді.

Әзірге бұл ереже күшіне енген жоқ. Ішкі істер министрлігі жаңа тетікті пысықтап, басқа елдердің тәжірибесін зерттеп жатыр.

Балл әрбір жол ережесін бұзғаны үшін есептелуі мүмкін

Ұсынылып отырған жүйеде жүргізушінің әрбір құқық бұзушылығы және оның қаншалықты ауыр екені ескеріледі. Негізгі мақсат, жол ережесін үнемі бұзатын жүргізушілерді бөлек бақылауға алу.

Қазір әрбір құқық бұзушылық пен оның ауырлығын ескеретін балдық жүйені енгізу пысықталып жатыр.

Министрдің айтуынша, бірнеше рет жасалған және ауыр құқық бұзушылықтар үшін айыппұлдан бөлек жүргізуші куәлігінің қолданысын бір жыл мерзімге тоқтату мүмкіндігі қарастырылуда.

Нақты қандай бұзушылық үшін қанша балл берілетіні, қанша балл жиналғанда куәлік тоқтатылатыны әзірге жарияланған жоқ.

Такси жүргізушілерін де автоматты түрде тексермек

ІІМ такси нарығындағы цифрлық бақылауды да күшейтіп жатыр. Саденовтің айтуынша, 2025 жылдан бері ведомство такси агрегаторларымен ақпарат алмасады.

Агрегаторларға оң жақ рульді шамамен 70 мың автомобильдің тізімі берілген. Мақсат, мұндай көліктердің такси қызметіне тіркелуіне жол бермеу.

Сонымен бірге жүргізушінің куәлігі де автоматты түрде тексерілмек. Жарамды жүргізуші куәлігі жоқ адам агрегатор арқылы жолаушы тасымалдауға жіберілмеуі тиіс.

Техникалық және медициналық тексеру де бақылауға алынады

Келесі кезеңде ІІМ таксиде жұмыс істейтін жүргізушілер мен көліктерге қойылатын басқа талаптарды да цифрлық жүйе арқылы тексеруді жоспарлап отыр.

• жүргізуші куәлігінің жарамдылығы;
• автомобильдің таксиде жұмыс істеуге рұқсаты;
• көліктің техникалық тексеруден өтуі;
• жүргізушінің рейс алдындағы медициналық тексеруден өтуі;
• жол ережесін жүйелі немесе өрескел бұзу фактілері.

Қазақстанда жүргізушілердің тәртібін балл арқылы бағалау идеясы бұған дейін де талқыланған. ІІМ мен Бас прокуратура жолдағы құқық бұзушылықтарды есепке алатын жүйені сынақтан өткізген. Енді ведомство оны әрі қарай қолданудың нақты тетіктерін әзірлеп жатыр.