Еуропада «Қайрат» – «Реал» матчының билеттері құнына таңданыс білдірді

Испанияның әйгілі спорттық басылымы AS.com алда өтетін Чемпиондар лигасы аясындағы «Қайрат» пен мадридтік «Реал» арасындағы кездесуге көлемді материал арнады. Басылым Қазақстан үшін бұл оқиғаның тарихи маңызына ғана емес, сондай-ақ билеттердің «аспанға шыққан» бағасына да назар аударды.

Алматыдағы ажиотаж

Қыркүйектің 30-ы күні Қазақстанның оңтүстік астанасында тарихта алғаш рет «Қайрат» мадридтік «Реалды» Чемпиондар лигасының топтық кезеңінде өз алаңында қабылдайды. Кездесуге деген қызығушылық ерекше жоғары болып, онлайн билет кезегінде 80 мыңға жуық адам тұрды – бұл Алматыдағы Орталық стадионның сыйымдылығынан үш есе көп.

Билет сату серверлері ауыртпалыққа шыдамады, ал әлеуметтік желілерде жанкүйерлердің шағымдары жауыннан кейінгі саңырауқұлақтай көбейді. Көптеген қазақстандықтар үшін бағаның өзі басты мәселе болып отыр.

Испандық пікір

AS.com деректеріне сүйенсек, Алматыдағы билеттер құны елестетуге қиын: 30 мың теңгеден (шамамен $50) 250 мың теңгеге (шамамен $500) дейін барады. Басылым осындай сандардың «ақылға сыймайтынын» атап өтеді, әсіресе Қазақстандағы ең төменгі жалақы 100 мың теңге (шамамен $170) екенін ескерсек.

«Алматыдағы билеттер құны Испаниядағы көптеген Чемпиондар лигасы матчтарынан да қымбат. Орташа жалақысы 200 доллардан төмен ел үшін бұл – нағыз сән-салтанат»,

Футбол мерекесі және «Қайрат» үшін үлкен сынақ

Сонымен қатар испан журналисі «Реалдың» Қазақстанға келуін тарихи оқиғаға балайды. Алматылық жанкүйерлер алғаш рет өз алаңында әлемдік деңгейдегі жұлдыздарды – Килиан Мбаппе, Винисиус Жуниор, Джуд Беллингем және басқа да айтулы ойыншыларды көрмек. AS басылымы команданы басқарған Хаби Алонсо бастаған ұжымның екі бағытта шамамен 10 мың шақырым жол ұшатынын ерекше мысалға келтіреді.

«Қайрат» топтық кезеңге жолдама алу үшін «Олимпия Любляна», KUPS, «Слован Братислава» және «Селтикті» тізе бүктіріп, іріктеу кезеңінен сүрінбей өтті. Бірінші турда алматылықтар Лиссабонда «Спортингтен» 1:4 есебімен ұтылған болатын, ал «Реалмен» болатын кездесу олар үшін ең маңызды сын болғалы тұр.