Путин, Си және Ким Бейжіңдегі парадта мәңгілік туралы әңгіме қозғады

Бейжіңде Екінші дүниежүзілік соғыста Жапонияны жеңуінің 80 жылдығына арналған парад кезінде қосулы микрофон Қытай, Ресей және КХДР көшбасшылары арасындағы ерекше әңгімені жазып алды. Қытай төрағасы Си Цзиньпин, Ресей президенті Владимир Путин және Солтүстік Корея жетекшісі Ким Чен Ын өмірді ұзарту және тіпті мәңгілікке қол жеткізу мүмкіндіктерін талқылады.

Әңгіме үзіндісі тікелей эфирде, халықаралық агенттіктер Reuters пен Associated Press арқылы көрсетілді. Кадрда аудармашы Путиннің «адам ағзаларын алмастыру және биотехнологиялардың дамуы арқылы адам барған сайын «жасара» түседі әрі адамзатты мәңгілікке бір табан жақындатады» деген сөздерін жеткізеді.

«Биотехнологиялар көмегімен ағзаларды шексіз алмастыруға болады... адамдар мәңгілікке де жетуі мүмкін» 

Оған жауап ретінде Си Цзиньпин күліп, қазіргі ғасырда-ақ адамдар 150 жасқа дейін өмір сүре алады деп атап өтті. Ким Чен Ын осы әңгімеде болды, бірақ оның сөздері эфирге шыққан жоқ.

Үш көшбасшы арасындағы осындай ашық әңгіме Қытай тарихындағы ең ірі әскери парад аясында өтті. Путин мен Ким Чен Ын құрметті қонақтар ретінде қатысты, бұл Мәскеу, Бейжің және Пхеньян ынтымақтастығының нығаюын айқындады.

Қытайда бұл сәт ресми дыбыспен жабылып, жергілікті әлеуметтік желілерде талқыланған жоқ. Алайда ел сыртында бұл кадрлар үлкен резонанс тудырды. Желі қолданушылары Путин шынымен осы сөздерді айтты ма деп сұрап, қосымша растауды талап етті.