Жасанды кірпіктері бар қыздарды көпшілік оңай қолжетімді деп қабылдайды

Кірпіктер адамның сырт келбетін қабылдауда ойлағаннан әлдеқайда маңызды рөл атқарады. Ұлыбританиялық ғалымдардың Archives of Sexual Behavior журналында жарияланған зерттеу нәтижесіне сүйенсек, кірпіктің ұзындығы көздің енінің үштен біріне тең болғанда – ең үздік, тартымды және сау деп бағаланады.

Эксперимент нәтижелерінде тағы бір қызықты жайт анықталды: тым ұзын кірпіктер тартымдылық пен денсаулықтың бағасын төмендеткенімен, қатысушылар оларды жыныстық еркіндік – кездейсоқ немесе қысқа мерзімді қарым-қатынасқа ашықтықтың белгісі ретінде қабылдаған.

Зерттеуге Ұлыбританияның 120 тұрғыны (77 ер адам және 43 әйел), орташа жасы 32, қатысты. Ғалымдар Daz3D компьютерлік бағдарламасын қолданып, төрт этникалық топқа жататын әйелдердің бет-әлпетін жасап, әрқайсына кірпіктің 11 ұзындығын (мүлде болмауынан бастап көз енінің жартысына дейін) бейнеледі. Қатысушылардан кейіпкерлердің денсаулығы, тартымдылығы және жыныстық еркіндігіне баға беру сұралды.

Нәтижелер барлық топта бірдей заңдылықты көрсетті: денсаулық та, тартымдылық та «төңкерілген U әрпі» тәрізді сипат алды, яғни кірпік ұзындығы көз енінің шамамен 0,33 болғанда ең жоғары баға берілді. Қысқа немесе тым ұзын кірпіктер тартымдылықтың бағасын төмендетті. Ал ұзын кірпіктер жыныстық ашықтықты тұрақты түрде жоғарылатып көрсетті.

«Біздің деректерге сүйенсек, кірпіктің ұзындығы жыныстық еркіндіктің қабылдануына оң әсер етеді, тіпті тартымдылық пен денсаулық төмен бағаланса да. Бұл ұзын кірпік тағудың астарында репродуктивті стратегия жатуы мүмкін екенін көрсетеді»,

Ғалымдардың пікірінше, бұл құбылыс жасанды кірпіктің кең таралуының себебін түсіндіреді, өйткені классикалық тартымдылық тұрғысынан олар әрдайым оң қабылдана бермейді.