Ормуз бұғазында жаңа қауіп пайда болды: мұнай бағасы неге төмендеді

Иран 25 маусымда Ормуз бұғазындағы жаңа теңіз бағытына қарсы шығып, кемелерге ескерту жасады. Бұл әлемдік мұнай нарығы үшін маңызды, өйткені Парсы шығанағынан шығатын танкерлердің қауіпсіздігі Brent бағасына да, энергия жеткізіліміне де тікелей әсер етеді, деп хабарлайды AP.

Әңгіме Либерия туы астындағы Stoic Warrior мұнай танкері туралы болып отыр. Кеме Ормуз бұғазынан Оман жағалауына жақын жаңа бағытпен өткен. Бұл бағытты Оман БҰҰ-ның теңіз тасымалын қадағалайтын Халықаралық теңіз ұйымымен бірге ұсынған.

Иран Ислам революциясы сақшылары корпусы бұл бағыт Тегеранмен келісілмегенін мәлімдеді. Иран тарапы кемелер тек өзі жариялаған бағытпен өтуі керек деп санайды.

Иран неге қарсы шықты

Иран әскери құрылымы жаңа бағытты «қауіпті» деп атап, одан тыс қозғалған кемелерге шара қолданылатынын ескертті. Бірақ нақты қандай шара болуы мүмкін екенін ашып айтқан жоқ.

AP мәліметінше, Stoic Warrior бұғаздан өткен кезде оқыс оқиға тіркелмеген. Кеменің артынан басқа да кемелер қозғалған. Бұл Ормуз арқылы тасымал біртіндеп қалпына келе бастағанын көрсетуі мүмкін.

Соған қарамастан жағдай толық тұрақталды деуге ерте. Бұғазда қауіпсіздік, сақтандыру, миналар және кемелердің нақты қай жолмен жүретіні сияқты мәселелер әлі де маңызды болып тұр.

Мұнай бағасы неге төмендеді

Ормуздағы шиеленіс әдетте мұнай бағасын өсіруі мүмкін. Бірақ бұл жолы нарық керісінше реакция берді: трейдерлер Таяу Шығыстан мұнай жеткізілімі көбейе бастады деп бағалап отыр.

Reuters мәліметінше, 25 маусымда Brent бағасы 72,68 долларға, ал WTI 69,58 долларға дейін төмендеген. Екі келісімшарт та 27 ақпаннан бергі ең төмен деңгейге жетті.

АҚШ энергетика министрі Крис Райттың айтуынша, соңғы тәулікте Ормуз бұғазынан кемінде 20 миллион баррель мұнай шыққан. Оның сөзінше, ағын соғысқа дейінгі деңгейге жақындаған.

Ормуз бұғазы неге сонша маңызды

Ормуз бұғазы Парсы шығанағын Араб теңізімен байланыстырады. Бұл тар теңіз жолы арқылы Сауд Арабиясы, Ирак, Кувейт, Қатар, Біріккен Араб Әмірліктері және Иран мұнайының үлкен бөлігі өтеді.

Бағалауларға қарағанда, әлемдік мұнай мен газ тасымалының шамамен бестен бірі осы бұғазға тәуелді. Сондықтан мұндағы кез келген қауіп сақтандыру құнын, тасымал бағытын және мұнай бағасын тез өзгерте алады.

Қазақстан үшін де бұл тақырып сырттағы алыстағы дау ғана емес. Brent бағасының өзгеруі мұнай экспортынан түсетін кіріске, нарықтағы күтулерге және теңгеге қатысты қысымға жанама әсер етуі мүмкін.

Қауіп толық сейілген жоқ

Reuters толық қалыпқа келу үшін бірнеше апта қажет болуы мүмкін екенін жазады. Бұған бұғаздағы қауіпсіздік шаралары, ықтимал миналарды тексеру және кеме иелерінің сақтық ұстанымы әсер етеді.

Егер танкерлер Ормуз арқылы тұрақты өте берсе, мұнай бағасына қысым азаюы мүмкін. Ал Иран мен Оман ұсынған бағытқа қатысты дау күшейсе, нарық тағы да тәуекелді бағаға қосады.