Балаға күннен күйген кезде қалай көмектесуге болады?

Балада күн сәулесінен күю терінің қызаруымен, ісінуімен, ауырсынуымен білінуі мүмкін. Кейде күлдіреуік пайда болып, дене қызуы көтеріледі, басы ауырады, жүрегі айнып, жалпы әлсіздік сезіледі.

Бала күнге күйсе не істеу керек

• Баланы күн көзінен алып шығыңыз — оны салқын, көлеңкелі жерге апарып, тері қалпына толық келгенше күнге шығармаңыз.
• Ауырсынуды басатын дәрі беріңіз — баланың жасына және салмағына сәйкес ибупрофен немесе парацетамол пайдаланыңыз.
• Теріні салқындатыңыз — салқын компресс немесе ваннаны пайдаланыңыз. Салқын суға малынған таза сүлгіні 10 минут бойы күніне бірнеше рет басыңыз.
• Ылғалдандыратын құрал қолданыңыз — ең дұрысы салқындатылған алоэ вера гелін қолдану. Оны күніне бірнеше рет жағыңыз.
• Көбірек су ішкізіңіз — дене қызуы жоғарыласа, сұйықтық тапшылығын өтеу өте маңызды.

Не істеуге болмайды

• Май, қаймақ, айран қолданбаңыз — бұл заттар тері жағдайын нашарлатып, инфекция қаупін арттырады.
• Арақ-спиртті компресс қоюға болмайды — спирттің құрамындағы заттар улануға әкеп соқтырып, жараның жазылуын баяулатады.

Қашан дәрігерге шұғыл қаралу керек

Егер балада төмендегі белгілер байқалса, дәрігерге жедел жүгініңіз:

• Үлкен күлдіреуіктер (әсіресе бетте, жыныс мүшелерінде және қолда)
• Дене қызуы 39 °C және одан жоғары
• Бас айналу, естің шатасуы немесе естен тану
• Күшті ауырсыну, құсу

Бұл симптомдар терінің ауыр зақымдануы мен организмнің қызып кеткенін көрсетуі мүмкін. Мұндай жағдайда дәрігерге тез арада көрініңіз!