Қазақстанда сталкинг пен қалыңдықты ұрлауға қылмыстық жауапкершілік енгізілді

Қазақстанда азаматтардың құқықтарын қорғауды күшейтетін қылмыстық заңнамаға жаңа түзетулер күшіне енді. Енді сталкинг пен неке қиюға мәжбүрлегені үшін қылмыстық жауапкершілік белгіленген.

Прокурор Айжан Аймаганова атап өткендей, бұл өзгерістер Мемлекет басшысының бастамасымен заң бұзушылықтарға мүлдем төзбеушілік қағидатын қамтамасыз ету үшін енгізілген. Түзетулер Қылмыстық, Қылмыстық-процессуалдық, Қылмыстық-атқару кодекстеріне және бірнеше ілеспе заңдарға енгізілді.

Сталкинг дегеніміз не және ол үшін қандай жаза қарастырылған

Қылмыстық кодекске жаңа 115-1-бап — «Сталкинг» енгізілді. Бұл заңсыз қудалау ретінде түсіндіріледі, яғни адамның еркіне қарсы, күш қолданбаса да, онымен байланыс орнатуға немесе ізіне түсуге тырысуы нәтижесінде елеулі зиян келтіру.

Сталкинг үшін келесі жазалар қарастырылған:

• 200 АЕК-ке дейін айыппұл (786 400 теңге);
• 200 сағатқа дейін қоғамдық жұмыстар;
• 50 тәулікке дейін қамау.

«Бұл тұрақты қоңырау шалу, аңду, интернет арқылы бақылау немесе жеке шекараны бұзып, қорқыныш не алаңдаушылық сезімін тудыратын басқа да үнемі мазалау формаларын қамтуы мүмкін»,

Қалыңдық ұрлағаны үшін жаза

Сондай-ақ, неке қиюға мәжбүрлеуге қатысты 125-1-бап енгізілді. Енді адамды күш қолдану, қорқыту немесе басқа да қысым әдістерімен еріксіз некеге отырғызуға әрекет жасағаны үшін мынандай жаза көзделген:

• 2 жылға дейін бас бостандығынан айыру;
• ауыр зиян келтірілсе — 10 жылға дейін бас бостандығынан айыру.

Түзетулер банктік, микроқаржылық және коллекторлық заңсыз қызмет үшін жауапкершілікті күшейтті, куәгерлердің құқықтарын кеңейтті және адвокаттарға қорғау актісін — айыптау актісіне қарама-қарсы құжатты сотқа ұсыну құқығын берді.