2025 жылдың жазында туристер неге Түркияда демалудан бас тартып жатыр?

Түркиядағы қонақүйлердің көпшілігі толық толмаған, ал туристер саны күрт азайып келеді, деп хабарлайды «ҚазАқпарат» халықаралық ақпарат агенттігі (Қазинформ).

Түркияда биылғы жазғы маусым күтулерді ақтамады – туристер саны төмендеп, өсім туралы сөз қозғаудың өзі қиын. Ekonomim газеті жариялаған деректерге сүйенсек, туристердің орташа тұру мерзімі өткен жылмен салыстырғанда 10 пайызға қысқарған, ал қонақүйлердің жүктемесі 5 пайызға азайған. Елеулі жеңілдіктер мен арнайы ұсыныстар да нарықты жандандыра алмады – биыл мамырда Түркияға келген шетелдік туристер саны 1,8 пайызға кеміген.

Сарапшылар туризмдегі құлдыраудың басты себептері ретінде төмендегілерді атайды:

• бағаның өсуі;
• орман өрттерінің жиілеп кетуі;
• басқа туристік бағыттар тарапынан өскен бәсекелестік;
• кейбір өңірлердегі геосаяси тұрақсыздық.

Осының бәрі туристерді ақша жұмсауда сақ болуға итермелейді әрі олар қысқа мерзімді сапарларды көбірек таңдауда.

Саланың мамандары ескертеді: егер туризмді дамытуда жаңа стратегия қабылданбаса, Түркия өзінің бәсекелік артықшылығынан 2026 жылы айырылып қалу қаупі бар.

Бұл мәселе әсіресе Анталия, Бодрум және Мармарис сынды туризм экономикасында маңызды рөл атқаратын ірі бағыттарға қатты әсер етуде. Аналитиктер туристік ағынды қалпына келтіру үшін сервистің сапасын арттырып, жаңа туризм түрлерін – сауықтыру, экологиялық және мәдени туризмді дамыту қажеттігін айтады. Сонымен қатар, елді халықаралық деңгейде белсенді әрі тиімді ілгерілету қажет.

Жедел әрекет жасалмаса, Түркия Жерорта теңізіндегі туризм нарығында көшбасшылық орнын жоғалтуы мүмкін – бұл ел экономикасы мен жұмыспен қамту жүйесіне ұзақ мерзімді теріс әсерін тигізеді.

Айта кету керек, бұрын Түркия экономикасы туризм мен жолаушылар транзиті, сондай-ақ медициналық туризмнің дамуы нәтижесінде оң көрсеткіштерге қол жеткізген еді.